Олий ва Биринчи Лига клублари матбуот котиблари учун ўқув семинари ўтказилади

Ўзбекистон Футбол Федерацияси Ижроия Қўмитаси қарори билан тасдиқланган Ўзбекистон Профессионал Футбол Лигасининг 2014-2018 йилларга мўлжалланган ривожланиш дастури асосида 26 февраль куни Тошкентдаги Miran International меҳмонхонасида Олий ва Биринчи лига футбол клублари матбуот котиблари учун халқаро ўқув семинари бўлиб ўтади.

Бир кунлик назарий ва амалий машғулотларни ўз ичига олган ўқув семинарини Осиё Футбол Конфедерацияси Медиа департаменти бошлиғи Четан Кулкарни олиб боради.

Шу муносабат билан Олий Лига ва Биринчи Лига клубларидан ушбу семинарда иштирок этадиган клуб матбуот котибини тавсия қилиб, иштирокчининг тўлиқ исм-фамилияси, алоқа маълумотлари (телефон рақами, электрон почта манзили)ни 18 февраль, сешанба кунига қадар media@the-uff.com электрон почта манзилига юборишлари сўралади.

Ушбу семинар Олий лига ва Биринчи лига мусобақаларида иштирок этаётган клубларнинг матбуот билан ишлаш борасидаги билим ва кўникмаларини ошириб, Ўзбекистонда профессионал футбол тарғиботини ривожлантириш ва футбол клубларининг мухлислар орасидаги обрў-эътиборини оширишга ёрдам беради.