ЎФА мутасаддилари Португалиянинг "Витория Гимарайнш" клуби академияси билан яқиндан танишишди

Жумладан, ЎФА 1-вице-президенти Умид Аҳмаджоновнинг маслаҳатчиси Санъат Шарипов, Терма жамоалар департаменти директори Шарофиддин Ҳожиниёзов Греция, Германия ва Чехия футбол федерациялари вакиллари билан учрашиб, ҳамкорлик бўйича келишувга эришишгани ҳақида аввал хабар бериб ўтгандик.
 
ЎФА мутасаддилари Португалиянинг "Витория Гимарайнш" клуби академиясида бўлиб, акамемия фаолияти билан яқиндан танишишди. Жумладан, академия раҳбари ва координатори, "Витория Гимарайнш" ёшлар жамоаси бош мураббийи Луис Кастро ва академия бош скаути, Скаутлар бўлими бошлиғи Роберто Мораис билан учрашув чоғида Португалия академиясида йўлга қўйилган иш тизими, мураббийлар тайёрлаш тартиби, болалар билан машғулотлар олиб бориш услуби ҳақида гаплашилди.
Шунингдек, келгусида Ўзбекистон U-16, U-19 терма жамоалари иштирокида "Витория Гимарайнш" клуби академияси жамоалари билан ўртоқлик ўйинлари ташкил қилиш масаласи ҳам муҳокама қилинди. Бундан ташқари, академия скаутлари мамлакатимизга таклиф этилди. Улар юртимиздаги иқтидорли футболчиларни кузатиб бориб, энг муносибларни Португалияга олиб кетишлари режалаштирилган.
 
"Витория Гимарайнш" клуби академиясига ташриф давомида ЎФА мутасаддилари бу ерда яратилган инфратузилма билан ҳам яқиндан танишишди.