ОЧЛда легионерлар лимити ошиши кўпроқ араблар фойдасига ишлайди

Осиё чемпионлар Лигасининг 2023/2024 йилги мавсумдан эътиборан куз-баҳор тизимига ўтиши анча олдин айтилганди. Яна бир янгилик шуки, келаси йилдан бошлаб ОЧЛ баҳсларида ҳар клуб 5+1 форматидаги легионерлар хизматидан фойдаланиши мумкин бўлади. Бунгача бир неча йилдан бери 3+1 га амал қилиб келинаётганди. 

Бу янгилик кўпроқ араб клубларига мойдек ёқиб тушган бўлиши аниқ. Чунки Осиёда легионерлар хизматидан кўпроқ араб жамоалари фойдаланишни хуш кўради. Бўлиб ҳам улар савияли легионерларга эътибор қаратади. 

Айниқса, Саудия Арабистони, Қатар, БАА клубларида пул кўп ва улар исталганча легионер трансфер қилиш имкониятига эга. Эрон бу борада етти ўлчаб бир кесадиган футбол жамоатчилигига киради ва улар қиммат ўйинчиларга кўп ҳам ошиқмайди. 

Легионерлар лимитининг ошиши ўзбек клублари учун фойдами? Ҳозирдан аниқ бир гап айтиш қийин-у, лекин бу жамоаларимизнинг ОЧЛдаги муносиб иштирокини янада қийинлаштирса керак. Чунки лимит ошгани билан биз шунга яраша кучли легионерларни жалб эта олмаймиз.

Бунинг учун бизда катта маблағ ҳам йўқ. ОЧЛ гуруҳ ўйинларини Ғарб минтақасида ўтказишимизни инобатга олсак, араб клублари янада кучаядиган бир пайт биз улар олдида ожизроқ бўлиб қоламиз. Чунки бизга келаётган "вич"лар ниманидир қойил қилишига ишониш қийин. 

Барса Блогер.