ОЧЛ. "Бунёдкор" сўнгги турда исталган ҳисобда ютса кейинги босқичга чиқади

"Бунёдкор" ўз уйида "Ал Фатҳ"ни 3:2 ҳисобида мағлуб этди. "Фулад" ҳам ўз майдонида "Ал Жаиш"дан устун келди - 3:1. Шу тариқа, "қалдирғочлар"да охирги турдан олдин кейинги босқичга чиқиш имконияти сақланиб қолди.

ОЧЛ регламентига кўра гуруҳда очколар тенг келиб қолса БИРИНЧИ бўлиб шу икки жамоа ўртасидаги ўйинларга қаралади. "Бунёдкор" Қатарда 1:0 ҳисобида ғолиб бўлса ҳам кейинги босқичга чиқади. Сабаби "Ал Жаиш" билан "Бунёдкор"нинг очколари 8тадан бўлади. Ўзаро ўйинларда иккала жамоа биттадан ғалабага эришишган бўлади. Тошкентдаги баҳсда "Бунёдкор" 1:2 ҳисобида ютқазган.

Тўплар нисбати 2:2. Гап шундаки ОЧЛ регламенти Европа Чемпионлар лигаси регламентидан фарқ қилади. Яъни сафарда урилган гол қоидаси бу вазиятда ҳеч қандай роль ўйнамайди. 2:2 бу ҳолатда ҳам тенглик бўлса жамоаларнинг гуруҳ босқичидаги умумий тўплар нисбатига қаралади.

№	Жамоа	Ў	Ю	Д	М	УГ - ЎГ	Т-Н	О
1	Фулад	5	3	2	0	6 - 2	4	11
2	Ал Жаиш	5	2	2	1	5 - 4	1	8
3	Бунёдкор	5	1	2	2	5 - 6	-1	5
4	Ал Фатҳ	5	0	2	3	2 - 6	-4	2

Ҳозир "Ал Жаиш"да +1 (5:4), "Бунёдкор"да -1 (5:6). Сўнгги турда "Бунёдкор" 1:0 ҳисобида ғалаба қозонса "Бунёдкор"да 6:6, "Ал Жаиш"да 5:5 бўлади. Бундай ҳолатда ОЧЛ регламентига кўра қайси жамоа кўпроқ гол урган бўлса ўша устун бўлади.

Хуллас, "Бунёдкор" охирги турда ғалаба қозонса бас. Кейинги босқич йўлланмаси нақд бўлади.

ЕЧЛ ва ОЧЛ регламентининг фарқ қилгани яхши экан...