Нурлибек Таласбоев: “Қувасойлик мухлислар жамоани сезиларли равишда қўллаб-қувватламоқда”

Учрашувдан сўнг қувасойликлар ҳужумчиси Нурлибек Таласбоев ўз фикрларини билдириб ўтди. Маълумот учун айтиш керакки, ушбу иқтидорли футболчи қорақалпоғистонлик бўлиб, 1994 йилда таваллуд топган. Бунгача асосан “Орол” шарафини ҳимоя қилиб келаётганди. Кечаги учрашувда Таласбоев ўз ҳисобига гол ёздириб қўйишга эришди.

- Очиғини айтганда, бугунги учрашувда жамоамиз фаворит эди. Шу боис майдонга фақат ғалабани кўзлаган холда чиққандик. Яратганга шукур, мақсадимизга эришдик. Энди бор эътиборимизни кейинги ўйинга қаратамиз. Олдинда бизни “Нурафшон”га қарши жиддий ўйин кутиб турибди. Имкон қадар бўлажак баҳсда ҳам мухлисларимизни хурсанд қилишга харакат қиламиз.

- “Ғиждувон” дарвозасига киритган тўпим жамоамга фойда келтирганидан хурсандман. Бу ерда ҳам мураббийлар мени ҳужум чизиғида ўйнатмоқда. Ўзингизга яхши маълум, олдинги чизиқ вакилидан фақат гол уриш талаб этилади.

- “Цементчи”га мослашиш жараёни узоқ давом этмади. Аксинча йигитлар мени яхши қабул қилди ва қисқа фурсат ичида жамоага киришиб кета олдим деб ўйлайман. “Цементчи”да яхши коллектив йиғилган дея оламан.

- Жамоага яратиб берилаётган шароитлар қониқарли даражада. Бунинг учун раҳбариятга миннатдорчилик билдирсак арзийди. Улар футболчиларга қўлдан келганича шароитларни яхшилаб бормоқда. Фақат ўйнаш керак.

- Бемалол айта оламанки, водийда халқ футболни жуда севади. Қувасойлик ишқибозлар борасида ҳам илиқ фикрдаман. Улар жамоани сезиларли равишда қўллаб-қувватламоқда. Бу эса табиийки биз футболчиларга қўшимча куч бағишлайди.


Исломбек Рустамбеков.