Нозим Муллаохунов: “Қўқон-1912”ни мағлуб эта олганимиздан хурсандмиз”

Рустам Абдуллаев жамоаси аслида Андижондан очко билан қайтиши ҳам мумкин эди. Лекин мезбонлар 3та тўп киритиб иродали ғалабага эришди. Учрашувдан сўнг “УзДонгЖу” бош мураббийи Муллаохуновдан интервью олдик.

- Албатта “Қўқон-1912”ни мағлуб эта олганимиздан хурсандмиз. Мухлисларимизга қувонч улашдик. Улар уйларига яхши кайфиятда қайтди - дея гап бошлади Нозим Муллаохунов. 

- Очиғини айтганда, охирги тўртта ўйинда мағлубиятга учраганимиз йигитларга руҳий жиҳатдан қаттиқ зарба бўлди. Уларни бу руҳий “ўрадан” олиб чиқиб кетишимиз керак эди. Шу боис “Қўқон-1912”га қарши баҳсга жиддий тайёргарлик кўргандик.

- Ўйинга келадиган бўлсак, ҳар иккала гол ҳам ўзимизнинг хатоларимиз эвазига юз берди. Айниқса иккинчи голдан кейин йигитларда бироз “синиш” бўлди. Лекин улар очко олиш мақсадида охиригача жиддий курашди ва иродали ғалабани қўлга киритдик.

- Меҳнатимиз бесамар кетмаганидан хурсандман. Бизни стадионда қўллаб-қувватлаб турганларга миннатдорчилик билдираман.

- “Қўқон-1912” ўйини хусусида ижобий фикрдаман. Таркибида тажрибали футболчилар йиғилган. Жамоанинг ўз ўйин услуби бор.

- Энди келгуси ўйинларга ҳам пухта тайёргарлик кўриб, мухлисларимизни хурсанд этишимиз керак.


Исломбек Рустамбеков суҳбатлашди.