Неъматулла Қуттибоев: "Суперлига йўлланмаси учун охиригача кураш олиб борамиз"

"Учрашув қизиқарли ўтди деб ўйлайман. Афсуски, биринчи бўлимда гол ўтказиб юбордик. Иккинчи таймда йигитлар ўзларига келиб олишди. Бир қатор вазиятлар бўлди, аммо улардан фойдалана олмадик", – деди Қуттибоев.

- Иккинчи таймда қизиқ ҳолат юзага келди. Жўрабоев ва Шерипов майдонга тушаётганида бирдан қарорингиз ўзгарди ва Синдаров ўйинга қўшилди...

- Йўқ. Ўзи Синдаров майдонга тушиши аниқ эди. Марказий ҳимоячимизда сариқ карточка бор эди, шундан қўрқиб тургандим, шу боис Жўрабоевни туширмоқчи эдим. Шу пайтда Дониёр Исмаилов уни ўзгартиришимиз кераклигини сўради ва бошқа ярим ҳимоячини туширишимизга тўғри келди.

- Про лигада мавсум якунланяпти. Олдинда иккита тур қолди. Жамоа Суперлига йўлланмаси учун охиригача курашадими?

- Худо хоҳласа, охиригача кураш олиб борамиз. Ўйлайманки, имкониятимиз яхши.