"Навбаҳор": Тайёргарлик Тошкентда давом эттирилади

Бир кун давомида ҳордиқ чиқарган жамоамиз аъзолари бундан бироз вақт олдин Тошкентдаги “Ўзбекистон” меҳмонхонасида тўпланишди. Жамоамиз аъзолари Навоийда “Қизилқум”га қарши учрашувда тайёргарликни пойтахтда олиб боришади. Бугун соат 18.30 да футболчиларимиз дастлабки машғулотни ўтказишади. Икки кун давомида Тошкентда машғулот ўтказилгач, жамоамиз аъзолари Навоий вилояти сари йўлга чиқишади. “Қизилқум” билан ўтадиган учрашувда сариқ карточкалари сони тўрттага етган Дилшод Жабборов иштирок эта олмайди. Аксинча Қўқондаги кубок баҳсида қизил карточка олган Хайрулла Каримовни дисквалификация муддати якунланганлиги сабабли Навоийда майдонга тушиш имконига эга бўлади. Навоийдаги учрашув 16 июнь куни соат 19.30 да бошланиши ҳақида “Қизилқум” футбол клуби матбуот хизмати хабар берди. Бир кун олдин бўлиб ўтадиган ёшлар биринчилигидан ўрин олган ўйинни 16.00 да бошлаш режалаштирилган.