МундиалГАЧА (5-сон). "Биз Осиё чемпионимиз, Аргентинада Ўзбекистонни ҳурмат қилишади" — Евстафеев, Убайдуллаев ёхуд улар мундиал олдидан нималар дейишди?

МундиалГАЧА рукнимизнинг галдаги сонида аввалги мундиалларда қатнашган футболчи ва мураббийларнинг фикрлари эътиборингизга ҳавола этилади. 

Аҳмад Убайдуллаев (Мураббий, Ўзбекистон U-20 терма жамоаси билан 2008 йил Осиё вице-чемпиони, 2009 йил Мисрдаги Жаҳон чемпионати қатнашчиси) - Жаҳон чемпионатида энг керакли нарса омад, деб ўйлайман. Кучли рақиблар бўлади. Бу албатта ёқимли. Менинг бошқарувимдаги жамоада аксарият футболчилар ҳали клубида ўйнамган, айримларини йиғиб Биринчи лигада қатнашганмиз. Ҳозир устун тарафи ўз жамоасининг асосий таркибида ўйнаётган ёшларимиз ҳам бор. Гуруҳдан бемалол чиқа олишади, деб ўйлайман. Мисрдаги мундиалда Уругвай билан учрашувдан ташқари қолган баҳсларда бемалол ҳаракат қилганмиз. Ганани 70-дақиқагача ютаётган эдик. Англия билан дуранг ўйнадик. Асосий етишмовчилик плеймейкекер Фозил Мусаев эди. Гана амалда мусобақада ғолиб чиқди. Англияда эса аксарияти АПЛда, ЕЧЛда ўйнади. Футболда омадга кўп нарса боғлиқ. 

Алексей Евстафеев (Ўзбекистоннинг U-16, U-17, U-20 терма жамоалари собиқ мураббийи, Мексика ва Туркиядаги мундиал қатнашчиси) - Аввалги ва ҳозирги ёшларни солиштириш қандай бўлади, билмайман. Лекин салоҳиятли ёш футболчилар етишиб чиқмоқда. Ҳозирги U-20 терма жамоамиз, ўтган йилги олимпия терма жамоамиз Осиё кубогида чиройли ўйинлар кўрсатишди. Равшан Ҳайдаров бошқараётган жамоа қитъа турнирида ғолиб чиққани қанчалик олдинга силжиганимизни англатади. Жаҳон чемпионатига келсак, ҳар қандай ҳолатда ҳам биринчи бўлиб гуруҳдан чиқиб олиш зарур. Кейинчалик кимлар рақиб сифатида тушади, кўрамиз. Уларга омад тилайман. 

Отабек Ғуломхўжаев (Ўзбекистон ёшлар терма жамоаси собиқ мураббийи) - Аввало Равшан ака Ҳайдаровни эътироф этиб ўтмоқчиман. Кучли мураббий, мутахассис. Ўзим ҳам терма жамоада ишлаганимда улардан кўп бор маслаҳат олганман. Қўл остида аҳил жамоа туза олади. Аргентинада бизни истаймизми ёки йўқ ҳурмат қилишлари шубҳасиз. Чунки йигитлар Осиё чемпиони, қитъа ғолиби бўлиб боришмоқда. Имкониятимизни юқори баҳолайман. Терма жамоамиз қанчалик узоққа борса, шунчалик хурсанд бўламиз. Потенциалимиз ярим финал, финалгача боришга етади. Таркибга тўхталсам, танқид ёки бошқа маънода эмас, бу албатта мураббийларнинг қарори. Лекин Умид Султоновни олиб кетиш ҳар ҳолда зарар қилмасди. Албатта омад тилаймиз, мухлислик қиламиз. Ўйлайманки, уялтириб қўйишмайди. 

Санжар Қувватов (2009 йил Мисрдаги Жаҳон чемпионатида иштирок этган) - 2009 йил Мисрга аслида учинчи дарвозабон сифатида борганман. Лекин мураббийлар Жаҳон чемпионати вақтида имконият беришган. Умримни охиригача эсдан чиқмайдиган хотиралар. Ўша ҳиссиёт қайтадан уйғонаверади. Футболчиларимизга омад тилаб қоламан. Отабек Боймуродовдан яна ажойиб ўйинлар кутиб қоламиз.Имкониятларимизни ҳамма билади. Бутун дунё гувоҳига айланди. Натижа қандай тугашидан қатъий назар Ўзбекистон ҳар бир терма жамоага етарлича бош оғриқ бўлади.  

Достон Турсунов (2015 йил Янги Зеландиядаги Жаҳон чемпионатида иштирок этган) - Юртимиздаги Осиё кубогида ёшларимизнинг нималарга қодирлигини ҳамма кўрди. Бунда жамоавий руҳ муҳим рол ўйнаган. Ўйлайманки, Жаҳон чемпионатида муносиб иштирок этишади. Биз Равшан ака Ҳайдаров билан 4 йил бирга ишлаганмиз. Ўша вақтда ҳам жамоа бир оила бўлган. Аргентина билан очилиш ўйини қийин бўлиши табиий. Агарда шу баҳсни ўз фойдаларига ҳал қилишса, ишонч ортади, кейинги беллашувлар осон ўтади. 2015 йил гуруҳдан чиқишимиз омад туфайли рўй берган. Деярли рақиблар даражаси ҳозирги билан бир ҳил. Гондурас, Германия, Фижи, ҳозир эса Аргентина, Гватемала, Янги Зеландия. Йигитлардан чиройли ўйин кутмоқдамиз. Ортга юзлари ёруғ ҳолда қайтишларини тилайман. 

Жавоҳир Соҳибов (2015 йил Янги Зеландиядаги Жаҳон чемпионатида иштирок этган) - Ўша мусобақани ўзим учун ҳаётимдаги энг яхшиси, деб биламан. Эсда қоларли лаҳзалар, ажойиб атмосфера. Янги Зеландияда бўлгани ҳам қайсидир маънода қизиқарли эди. Ҳудди эртаклардаги каби. Чорак финал ёмон натижа эмасди. Гватемала ва Янги Зеландияни ёшларимиз бемалол юта олади. Аргентина билан ҳам ғалаба қозонса бўлади. Гуруҳдан чиқиб камида бизнинг натижамизни такрорлай олишлари мумкин. Худо хоҳласа Жаҳон чемпионатидан сўнг тўхтаб қолишмайди, деган умиддаман. Қолаверса, ҳозир эътибор яхши даражада. "Олимпик", "Олимпия" каби лойиҳалар йўлга қўйилди. Муҳими ҳеч қайси футболчи жароҳат олмасин. 

МундиалГАЧА (4-сон). Мўъжиза ёхуд Ўзбекистоннинг 2015 йил Янги Зеландиядаги саргузаштлари

МундиалГАЧА (3-сон). Футболимиз тарихида янги саҳифа очган йигитлар ёхуд 10 йил олдинги U-20 Жаҳон чемпионатини ёдга оламиз

МундиалГАЧА (2-сон). Смоллинг, Айю, Триппьерга қарши ўзимизнинг Каримов, Нагаев, Қувватовлар ёхуд Миср-2009 Жаҳон чемпионати

МундиалГАЧА (1-сон). 2003 йилги Жаҳон чемпионати ёхуд Маскерано ва Иньестага қарши ўзимизнинг Гейнрих, Иномов, Суюновлар

Абдулазиз Искандаров