Моуриньо: "Бир вақтнинг ўзида 600-700 млн. фунт эвазига 6 нафар футболчини харид қила олмайман"

"Клуб менга 600 млн. фунт бериб, 100 млн. фунтдан олти нафар футболчи харид қилишга имкон беради деб ўйлайсизми? Йўқ, клуб бундай қилмайди ва буни кута олмайман. Ҳозирги бозорни ҳисобга олсак, танқид қиладиган жой йўқ.  Гвардиола, клуб ходимлари ёки футболчилар ҳақида ёмон гап айтмоқчи эмасман, бироқ улар қилаётган иш доимо қўллаб-қувватланади.

Пеп келганида унинг қўл остида Англия посбони (Жо Харт) бор эди. Аммо у Гвардиолага ёқмайди, шу сабабли у "Барселона" дарвозабонини (Клаудио Браво) харид қилди. Унга навбатдаги голкипер ҳам ёқмади, шу сабабли яна бир футболчи (Эдерсон) сотиб олинди. Энди унинг кўнгли жойида.

Пепда Сабалета ва Коларов бор эди, бироқ улар 30дан ошган. Гвардиола уларни ўзгартирмоқчи бўлди ва икки футболчи ўрнига уч ўйинчини (Кайл Уокер, Бенжамин Менди, Данило) олиб келди.

Бир вақтнинг ўзида 6 ёки 7 футболчини харид қила оламизми? 600-700 млн. фунт сарфлашга қодирмизми? Йўқ. Ҳаммаси осон эмас. Сўнгги йилларда бозор қуйидаги йўналишга бурилмоқда: Сиз фэйр-плей ва чегара йўқ жамоалар сафига кириб, хоҳлаганингизни сотиб оласиз, ёки қийинчиликларга дуч келасиз" - дейди Моуриньо.