МОФА томонидан Тошкентда “CAFA U-16 championship” мусобақаси ўтказилади

16 ёшгача бўлган футболчилардан ташкил топган Ўзбекистон, Тожикистон, Афғонистон ва Қирғизистон терма жамоалари Тошкентдаги "Миллий" стадионида ташкил этилаётган “CAFA U-16 championship” мусобақасида куч синашишади.

Мусобақа давомида Марказий Осиёдаги камида "В" тоифага эга мураббийлар учун ўқув курслари ташкил этилади. Бу ўқув курсларида Марказий Осиё футбол ассоциациясига аъзо мамлакатларнинг 2 нафардан вакили ҳамда ўзбекистонлик вакиллар иштирок этишади. Ўқув курсларини ОФК инструктори Ислом Аҳмедов ва ОФК техник қўмитаси аъзоси Шовкат Имамовлар олиб боришади.

"Марказий Осиё мураббийлари учун бу каби ўқув курслари Ўзбекистонда биринчи марта ташкил қилинмоқда. Бундан мақсад, нафақат Ўзбекистонда, балки минтақада футболнинг ривожланишига ҳисса қўшиш, мураббийлар малакасини ошириш, футбол ривожини янги босқичга олиб чиқишдан иборат. Ишончим комилки, бу каби саъй-ҳаракатлар албатта ўз самарасини беради", - дейди Марказий Осиё футбол ассоциацияси Президенти ва ЎФА биринчи вице-президенти Умид Аҳмаджонов.