“Иштихон” бош мураббийи Миржалол Лоқаев: "Йигитларимиз уч ойдан бери маошсиз ўйнашмоқда. Вазият ўзгаришини кутяпмиз"

"Бизнинг жамоа учун қийин ўйин бўлди. Рақибни ҳақли ғалаба билан табриклайман. Биринчи лига ва Суперлига даражаси билиниб қолди. Йўл чарчоғи ва бошқа сабаблар бугунги натижага таъсир қилди. Йигитларга раҳмат айтаман. Улар уч ойдан бери маошсиз ўйнашмоқда. Барибир футболни алдаб бўлмайди", -дейди Миржалол Лоқаев.

– "Олимпик" мағлуб этилди. "Машъал" ва "Шўртан"га имконият бор берилди. Демак, бунга моддий сабаб ҳам таъсир ўтказганми?

– Мавсум бошида ҳамма жамоа ҳам тайёр бўлмайди. Менимча, йигитларда мавсум бошида мотивация бор эди. Ўйнашга хоҳиш бор эди. Шуни таъсирида бошида ғалаба қозондик. 

– Буёғига режалар қандай? 

– Вазият ўзгаришини кутяпмиз. Кутинглар дейишяпти. Мавсум бошида Биринчи лигада учликка кириш вазифаси қўйилганди. 

– Бу ҳолатда ўша вазифани уддалай оласизларми?

– Бунинг учун раҳбариятдан ҳам туртки бўлиши керак. Яхши йигитлар бор бизда. Суперлига кўрган, Про лигада ўйнаган футболчиларимиз бор.

– Кубок ўйинлари "Иштихон"га қандай ҳақиқатларни очиб берди?

– Биз учун тажриба бўлди. Стадионимиз тўлди. "Иштихон"да бундай бўлмаган. Тўрт мингга яқин мухлис кирди стадионга. Суперлига жамоасининг Иштихонга келиши байрам бўлди.

– Маошлар берилмаётган бўлса сафар харажатлари қандай қопланяпти?

– Ҳомийлар, фермерлар... Ҳоким айтади, олиб келиб беришади. 4-5 млн сўм катта пул эмас-ку... Ўйин куни борамиз стадионга. Йигитлар футболни яхши кўрганлари учун юришибди. 

– Иштихонда футболни қандай қабул қилишади?

– Мухлислар футболни севишади. Ҳар бир ўйинимизда стадионимиз тўляпти. Футболни яхши кўришади.