"Металлург" ёшлари ва асосий таркиби дуранг ўйнади

Илгари хабар берганимиздек, ёшларимиз Олмалиқда, асосий таркиб эса Тошкентда – “Бунёдкор” ўринбосарларига қарши майдонга чиқишди. Ҳар иккала учрашувда бир хил дуранг натижа қайд этилди – 1:1.

Олмалиқда бўлган учрашувда Февзи Давлетов ҳамда Одил Исабоев етакчилигидаги ёшларимиз ўйин давомида ғалаба қозона туриб, уни сақлаб қолишнинг уддасидан чиқа олишмади. Биринчи таймда мезбонлар дарвозабони тўпга чиқишда қўпол ўйнади ва пенальтидан Азиз Алимов унумли фойдаланиб, ҳисобни очганди. Иккинчи таймда “Олмалиқ” жамоаси ёшлари ҳисобни тенглаштиришга муваффақ бўлишди.

Асосий таркибнинг “Бунёдкор” ёшларига қарши ўйинида Олмалиқдаги учрашувнинг аски кузатилди. Даставвал бунёдкорчилар ҳисобни очишди ва биринчи таймни ўз фойдаларига ҳал этишди. Иккинчи таймда ўйин суръатини оширган бекободликлар мағлубиятдан қутилиб кетишди. Жавоб голи муаллифи Саиджон Абдужабборов бўлди.
Жамоадаги янгиликларга тўхталадиган бўлсак, янги ўйинчилар келиб қўшилмади. Ўз навбатида жамоани тарк этганлар ҳам йўқ. Фақатгина назорат ўйинлари ва машғулотларда бироз лат еганлар бор. Жумладан, Аюбхон Нўъмоновни оёғидан, Алишер Зиёвуддиновни эса белидан олган жароҳат безовта қилмоқда. Умид қиламизки, бу жароҳатлар унчалик оғир эмас ва улар тез орада яна машғулотларни давом эттиришади.