“Металлург” ғалабасида 18 ёшли Жавоҳирнинг ҳиссаси

Ўйиннинг 52-дақиқасида киритилган гол эса ўз навбатида меҳмонлар кайфиятининг янада кўтарди. Бу вазиятда бекободликлар ҳужумни марказдан ташкил этишди. Дилмурод Каримов томонидан узатилган тўпга Зоҳид Абдуллаев ета олмади. Жамоадошини ёлғизлатиб қўймаслик учун ўнг қанотдан юришини давом эттираётган Жавоҳир Эсонқулов эса тўпни эгаллаб олди ва ўткир бурчак остида оёқларининг учи билан зарба берди. “Машъал” посбони жамоасини голдан сақлаб қололмади.

Шу куни “Металлург”нинг ёш ҳужумчиси иккинчи голнинг киритилишида ҳам бевосита иштирок этди. Майдон марказида Зоҳид Абдуллаевга нисбатан ўйин қоидаси бузилди. Бекободликлар тезлик билан жарима тўпини тепишди. Дилмурод каримов тўпни ўнг қанотдаги жамоадоши Жавоҳир Эсонқуловга узатиб берди. Жавоҳир эса ўз навбатида Мирғиёс Сулаймоновнинг ҳимоячиларни чалғитишидан унумли фойдаланиб, тўпни жарима майдонига узатди. Ўнг қанотдан ҳеч кимнинг таъқибисиз жарима майдонига югуриб келаётган Саиджон Абдужабборов тўпни боши билан уриб, дарвоза тўрига туширди. Ўзининг мамлакат миллий чемпионати иккинчи учрашувида майдонга тушган Жавоҳир Эсонқулов битта гол киритди ва битта голга ассистентлик қилиб, жамоасининг ғалабасига муносиб улуш қўшди.

Баъзи манбаларда голлар ва ассистентлар борасида ноаниқ маълумотлар берилганлиги боис, “Металлург”нинг учинчи голига ҳам тўхталамиз. “Машъал” футболчилари 84-дақиқада тўпни майдон ташқарисига чиқариб юборишгач, Мирғиёс Сулаймонов тўпни ён чизиқдан жарима майдонига ташлаб берди. Ҳимоячилар тўпни яна қайтаришди. Бу сафар ҳаммадан олдин тўпга Сулаймонов етиб келди ва уни жарима майдони ичига узатди. Зоҳид Абдуллаевнинг бош билан тўп йўналишини ўзгартирганди, аммо тўп дарвоза устунига тегиб қайтди. Зоҳид эса иккинчи уринишда тўпни дарвозага киритиб, чемпионатдаги голлари сонини 3 тага етказиб олди.

"Машъал" - "Металлург" - 1:3 (1:0). 11 март 2016. Муборак. Баҳром Вафоев номидаги стадион. 4210 томошабин.
Ҳакамлар: З. Қодиров (Навоий) - 8,4, Н. Рўзимов (Тошкент) - 8,3, Р. Нўъмонов (Тошкент) - 8,3, А. Эргашев (Тошкент) - 8.
Назоратчи: О. Дачев (Тошкент).

Голлар: Зафар Тўраев 13, - 1:0 (Жамшид Ҳасанов), Жавоҳир Эсонқулов 52, - 1:1 (Дилмурод Каримов), Саиджон Абдужабборов 73, - 1:2 (Жавоҳир Эсонқулов), Зоҳид Абдуллаев 84, - 1:3 (Мирғиёс Сулаймонов).
 

"Металлург" матбуот хизмати