"Мен ҳам ёзишни хоҳлайман" рукнига. "Навбаҳор"га фойдам тегса ёхуд оддий мухлиснинг таклифлари

Қуйида ана шундай мақолалардан бирини эътиборингизга ҳавола этамиз. Агар сизда ҳам ёзиш истаги бўлса, э-майл орқали [email protected] манзилига юборишингиз мумкин. Шунингдек, биз билан Телеграм орқали ҳам боғланиш имкони бор - https://t.me/CA_admin

Сўнгги йилларда мураббийлар қўнимсизлиги, жамоада молиявий ҳолатнинг унчалик яхши бўлмагани "Навбаҳор"нинг чемпионатда ўтиш ўйинида иштирок этиш даражасигача бориб етди. Сўнгги паллада мураббийликка таклиф қилинган Илҳом Мўминжоновнинг жамоанинг бугунги ҳолатида тутган ўрни алоҳида. Қуйида Наманган футболи, ютуқ ва камчиликлар ва келажаги борасида ўз таклифларим билан ўртоқлашишни жоиз билдим.

Яқинда сайтда эълон қилинган ёш мураббийлардан бири Бобур Зуҳриддинов билан интервюни ўқиб, унинг бир гапи эътиборимни тортди. "Бизда селекционер деган инсон йўқ". Ҳа, чинданам бу борада хақиқатни гапирибди. Бир пайтлар "Нефтчи" клубини бошқарган Юрий Саркисяннинг қишлоқларга бориб ёш иқтидорларни топиб келишини эшитгандик. Ҳозир қайси мураббийни кўрсата оламиз у каби изланадиган? 

"Навбаҳор"да эса шунча йилдан буён ишлаган бирор мураббий қила олмаган ишни, футболчи сифатида Одил Ахмедов бошлаб берди. Ҳа, Одилнинг хориж чемпионатларида ўзлаштирган принциплари баъзи инсонларга малол келгани ҳам аччиқ ҳақиқат. Унинг Наманганда бошлаган ишларига қарши чиқувчилар кўп куттиришмади. Уларни ҳам тушиниш керак аслида. Эскича тизим инсонлари сифатида уларга замонавий принциплар умуман тўғри келмасди. 

Одилнинг академиясига ҳақиқий талантлар танлаб олиниши баъзи инсонларнинг молиявий мақсадларига қарши ишлади. Натижада кимнингдир жияни, кимнингдир ўғли ва яна кимнингдир эркатойлари бу кўрикдан ўта олишмади. Шу ўринда Наманган вилоят ва шаҳар ҳокимларига ҳамда Одил Аҳмедовга чуқур миннатдорчилик билдириб қоламиз. Чунки ўзбек футболи шунақа эркатойлардан безиб бўлди.Эътироз бўлса марҳамат, яқиндагина Яман чиққан Осиё чемпионатидан мосуво қилган Нуралиев жамоаси таркибига эътибор беринг. Бундай ҳолатлар футболимиз зарарига ишлаяпти. 

Бу эркатойлар эртага олий лигамизда бир клубдан иккинчисига ўтавериб, ҳатто Оммавий ахборот воситаларининг саҳифаларини ҳам сийқасини чиқарворишади. Наманганда иш бошлаган янги академия эса яқин келажакда ҳақиқий истеъдодларни кашф қилишига шубҳам йўқ. Академия сўзига алоҳида урғу берганим бежиз эмас. Чунки ўз академиясига эга бўлмаган клубдан барқарорлик кутиш умуман нотўғри. Бир йиллик смета асосида қандайдир вақтинчалик натижага эришиш мумкиндир, лекин бу клуб кейинги мавсумдаёқ олий лигада жон сақлаб қолишга мажбур бўлиб қолиши табиий ҳол. Бугун биз "Навбахор" келажаги ҳақида анча хотиржам бўлишимиз мумкин. Бунга ҳозирча асос яратилди. 

Клуб инфратузилмаси барқарорликка эришишда муҳим омилдир. "Насаф" ва "Бунёдкор" клубларининг бу борадаги ишлари анча самарали эканлиги таҳсинга сазовор. Бу клублар вақтинча муваффақиятсизликка тушиб қолишлари мумкин, лекин улар ўзларини тиклаб олиши учун кўпи билан бир мавсум етарли. Бунга ҳар икки клуб мисолида гувоҳ бўлишимиз мумкин. Клуб раҳбари, барча ходимлар ўз ишини сидқидилдан бажарса, жамоа ҳолати анча яхши бўлади. Агар раҳбарият ўйинчи ва мураббийлар билан самарали фаолият олиб бормаса, салбий натижага олиб келади. "Навбаҳор"да ҳозирча оддий мухлис сифатида билганимиз, клуб Президентининг футболга қизиқиши. 

Раҳбариятдан эса футболчиларнинг трансфер масаласида самаралироқ ишлашларини сўраб қолардим. Айтайлик, келажаги бор ўйинчилар билан узоқ муддатли шартномалар тузилса. Бу эртага ўша футболчининг кўтарма пули эвазига бошқа клубга ўтиб кетиши олдини олибгина қолмай, балки клуб ғазнасига яхшигина даромад ҳам олиб келиши аниқ. Бугунги ҳолатдан келиб чиқсак, жамоа юрагига айланиб улгурган ёш ва иқтидорли футболчимиз Азизбек Турғунбоев агар 5 йиллик шартнома таклиф этилса, йўқ демаса керак. 

Эртага қайсидир кучлироқ клуб қизиқиш билдирса, трансфер суммасини тўлаб олиб кетиши мумкин бӯлади. Ёки бу йил кўрик асосида ўринбосарлар таркибига жалб этилган Акмал Турғунбоев ҳам (унинг Азизбек Турғунбоевга ҳеч қандай алоқаси йўқ) юқори салоҳиятга эга экани, ўринбосарлар таркибида умидлилар етарли эканидан далолат. Бундай истеъдодларни яқин йилларда академиямиздан чиқишини ҳисобга олсак, раҳбариятдан шу фикрни инобатга олишларини сӯрайман. Яъни, барча ёш футболчиларимиз билан узоқ муддатли шартномалар тузилса мақсадга мувофиқ бӯларди. 

Бевосита бугунги таркиб масаласида гапирадиган бўлсам, бош мураббий Илҳом Мўминжонов сўнгги йиллардаги энг яхши таркибни йиққани аниқ. Мавсум бошида асосан маҳаллий футболчиларни жалб қилгани барчамизни хурсанд қилди. Мураббийнинг ишига аралашиш фикридан йироқман. Лекин бир нечта мухлисларнинг фикрини шу ерда билдиришни лозим топдим. Яъни, жамоамизнинг асосан номинал битта ҳужумчи билан ўйнаши кўпчилигимиз учун ёқимсиз ҳолатга айланиб бормоқда. 

Натижага мураббий жавоб бериши тўғри, лекин бир ўйиндаги мажбурий ўзгариш натижасида икки номинал хужумчи билан ўйнаган "Навбаҳор" ўйинини кўрган мухлис сифатида шуни айтишим мумкинки, жамоа ҳатто икки ҳужумчи билан анча шиддатли кўринганди. Мураббийдан тактик схемаларда турли вариантлар устида ҳам ишлаб кўришини сўраб қоламан. Ваҳоланки, бир тўп фарқи ҳар қандай сонияда йўққа чиқиши мумкин. Бутун Европа ҳозир 4-4-3 ёки 3-4-3 схемага ўтиб кетган бир пайтда бизнинг мураббийлар ҳалиям иттифоқ давридан мерос 4-5-1 схемада ўйнаб юриши мухлисларга ҳам зерикарли бўлиб кетган. 

"Навбаҳор" стадиони мамлакатимиздаги кўркам ўйингоҳлардан бири ҳисобланади. Фақат стадион чими масаласида ўзгариш қилинса нур устига нур бӯларди. Кўпчилик мураббийларнинг стадион чимидан нолишгани бекорга эмас. Стадионга бориб турган ашаддий мухлислар буни яхши билишади. Демак, стадион майсаси парваришига алоҳида эътибор берилиши ёки янги мавсумгача чимни алмаштириш масаласи кўриб чиқилиши керак. 

Ўзбекистон телеканалларида намойиш этилаётган футбол кўрсатувларининг "Навбаҳор" ҳақида деярли сўз очмаслиги, наманганлик ишқибозлар таъбини хира қилиб келмоқда. Оддийгина "Спорт" ТВдан намойиш этиладиган "Фифа" кўрсатувида ушбу мавсум жамоамиз ҳақида айтарли маълумот ёки репортаж берилмаслиги, кўрсатувни интизорлик билан кутадиган мухлисларимиз хафсаласини пир қилганига мунтазам гувоҳ бўлиб келмоқдаман. 

Ва клубимизнинг энг ҳурматга сазовор жиҳати - МУХЛИСЛАРни катта ҳарфларда ёзмаслик нотўғри бўлади. "Навбаҳор" мухлислари ҳар доим Ўзбекистонда биринчилардан бӯлиб келишган. Жамоани қўллаш борасида таърифга тил ожиз. Шунчаки перфект. Ҳатто маданиятли мухлислик борасидаям анча ўсишга эришилган. Клубнинг ҳозирги натижаларида мухлисларнинг ҳам хизмати беқиёс. Ҳозирда стадионда стюардлардан фойдаланиш борасидаги дастлабки қадам "Навбаҳор" мухлислари томонидан ташланганини алоҳида эътироф этиш керак. 

Наманганлик ишқибозлар керак бўлса матбуот хизмати вазифасиниям ўзлари бажариб келишмоқда. Клуб расмий сайтига ташриф буюрсангиз, асосан мухлислар томонидан ёзилган мақола, футболчилар билан интервьюлар гувоҳи бўлиш мумкин. Ҳар ўйинда янгилик киритадиган мухлислар клуби хозиргача анча ишларни амалга оширишди. Ҳатто клуб маркетинг фаолиятини қўлламайдиган бир вақтда мухлислар сардорлари клуб этикеткалари, футболкаларини сотиш орқали анча даромад қилиш мумкинлигини кўрсатиб қўйишди. Мухлислар томонидан мустақил тайёрлатилган футболкалар, байроқчалар, шарфлар бунга мисол. Агар клуб мутасаддилари стадион атрофида махсус магазин очиб, клубга тегишли нарсалар савдосини йўлга қўйилса, ҳам клуб ғазнасига фойда, хам мухлисларга ёрдам бўларди. Негаки футболка ёки шарфларни қаердан олишни билмай юрган ишқибозлар етарлича топилади. 

Мен фақат ўз таклифларимни билдириб ўтдим холос. Бу инобатга олинадими ёки йўқ, менга қоронғи. Мен профессионал журналист эмасман ва бунга даъво ҳам қилмайман. Лекин, мавжуд ютуқлар билан ҳаволаниб юришдан кўра, камчиликлар устида ишлаш ва уларни бартараф этиш керак деган принцип асосида яшайман. Камчиликларга кўпроқ урғу берганим футболимиз ривожи учун нимадир берса, шундан хурсанд бўламан. Танқидларимдан кимдир тўғри хулоса чиқарса, демак мен мақсадимга қисман бўлса-да эришган ҳисобланаман. 

Сардорбек Исроилов, Наманган вилояти, Тўрақўрғон тумани.