Максим Шацких: "Пахтакор"нинг яқин захирасини нималарга қодирлигини кўриб олдик. Мураббий эса ҳар доим ёмон"

"Бугун ёмон ўйнамадик. Вазиятларни реализация қилишда оқсадик. Голсиз эса албатта нимадир қилиш қийин",- дейди Шацких.

- "Пахтакор" учун бугунги ўйин ҳеч қандай аҳамиятга эга эмасди. Бу нарса мотивацияга тўсқинлик қилмадими?

- Мотивация нима учун бўлмаслиги керак? Бугунги таркибни кўрдингиз, бугун асосий жамоанинг захирасини нималарга қодирлигини кўрмоқчи эдик. "Пахтакор" таркибидаги аксарият футболчилар  футболчилик сифатларига эга бўлмаган тарзда сунъий равишда ушланиб турибди. Шунинг учун тўғри хулоса қилсак олдинга ривожланамиз. Мен гапимга жавоб бераман. Мураббий эса ҳар доим ёмон. Футболчилар ўзининг ўйинини таҳлил қилмаса, хулоса чиқармаса ўсишга эришмайди. Бу ҳақида доим гапираман. Бугун ҳам ўйиндан олдин айтдим. Яхши майдон ва шунга мос рақиб. Марҳамат ўзингизни кўрсатинг. Такрорлайман ёмон ўйнамадик. Футболчиларда қаердадир маҳорат етишмади.  Бугун улар ўз ҳаракатларини таҳлил қилса, эртага бошқача бўлиб тушади. 

- Жамоанинг ёшлар ва ўринбосарлари чемпион бўлди. "Пахтакор"да эртанги кун учун яхши захира етишиб чиқмоқда. Уларни кузатяпсизми? Жамоани ёшартириш жараёнида таркибда 2-3 нафар ёши катта футболчилар ҳам бўлиши керак деб ўйлайман... 

- Бугун ўйнаган ёшларимиз энг яқин захирамиз ҳисобланади. U-19, U-21 чемпион бўлгани яхши албатта. Ўринбосарларнинг барча ўйинларини кузатиб бораман. Сиз U-19 ўйинини кўрдингизми?

- Финал учрашувини стадиондан кузатдим...

- 2007 йиллар ўзидан катталар билан битта лигада ўйнамоқда. Бунинг натижасини кўрамиз, чунки U-19 ва U-21, асосий жамоа бир-биридан фарқ қилади. Футболчи ўсишни истаса атроф муҳитини ўзгартириши керак. Фақат бизда эмас, бошқа давлатдарда ҳам шундай. Ҳаётга бўлган қарашини ўзгартириши керак. Ўзининг мақсадларини тўғри қўйиши лозим. Ким биринчи жамоага қўшилади? Буни вақт давомида кўрамиз. Ўринбосарлардаги ҳаммани биламан.