«Локомотив» матбуот хизмати қуръа ташлаш маросимини ТВда тўғридан-тўғри эфирга узатилганини алоҳида эътироф этди

- Қуръа жараёни аввалгиларига нисбатан, анча ўзгача тарзда ташкил этилгани менга манзур бўлди. Айниқса, қуръанинг бевосита ТВ орқали намойиш этилгани таҳсинга сазовордир. ПФЛнинг ташкилий жиҳатга алоҳида эътибор билан ёндошгани сезилиб турди. Қуръа натижалари ҳақида гап кетса, "Локомотив" илк турни сафарда "Қизилқум"га қарши ўтказадиган бўлди. 

Қизиғи шундаки, "Локомотив" ўтган йили ҳам чемпионатни сафарда бошлаган эди. Лекин бу йил формат ўтган йилгидан буткул фарқ қилиши ҳам бор гап. Эндиликда чемпионатимизнинг юқори лигасида 12та жамоа ғолиблик учун баҳс олиб боришади. "Локомотив" амалдаги чемпион сифатида ўз унвонини сақлаб қолишга уринади. Олдинда бизни муросасиз баҳслар кутаётганига аминман. Зеро янги мавсумдан клублар олдига қўйилаётган талаблар юқори. Шу билан биргаликда жамоалардан мухлислар олдингилардан яхшироқ ўйин кутиши ҳам тайин. Шу боисдан ҳам янги мавсумни интиқлик билан кутяпман - дейди Зоҳирбек Акрамхонов.