Липпи яна ўз ўрнига қайтди

2006 йилги жаҳон чемпионати ғолиби Марчелло Липпи шу йилнинг 25 январь куни Хитой терма жамоаси бош мураббийлигидан кетганди.Бироқ орадан тўрт ой ўтиб тажрибали мутахассис яна ўз лавозимига қайтди. 

Маълумки, Липпи Хитой тарк этгач, италиялик бошқа бир мураббий Фабио Каннаваро бироз муддат терма жамоани бошқарди. Лекин "China Cup" мусобақасидан сўнг бу мураббий истеъфога чиқарилди. Бўшаб қолган ўринга Хитой футбол федерацияси яна Марчелло Липпини таклиф қилди. 

Қайта тайинланувга Хитой футбол федерацияси шундай баёнот берди: "Марчелло Липпи даврида терма жамоа ўсишга эришди. Биз ишонамизки, ғалабали онлар ҳали олдинда. Ва ўйлаймизки, айнан Липпи қўл остида терма жамоа жаҳон чемпионати йўлланмасини қўлга киритади". 

Яна терма жамоа рулига қайтган кекса мураббий ўзининг илк учрашувини 7 июнь куни Филиппинга қарши (ўртоқлик ўйини) ўтказади. Орадан тўрт кун ўтиб хитойликлар Тожикистон термаси билан куч синашишади.