Константин Новиков: "Ҳалокат ҳақида 14 август куни айтишган"

Айни пайтда Карагандада истиқомат қилаётган бир инсон ҳам мўжиза туфайлигини ўша машъум санада ўз клуби сафида Минскка учмаган эди. Унинг исми Константин Новиков. У фаҳрийлар ўртасидаги мини-футбол турнирлари орқали кўпчиликка яхши таниш.

Досье: Константин Новиков

1961 йили 21 сентябр куни Тошкентда туғилган.

Футболчилик фаолияти:

1979/84 йилларда “Пахтакор
1985 – “Звезда” (Жиззаҳ)
1986/92 – “Хонқа” (Хоразм)
1992/94 – МТК (Венгрия).
СССР ўсмирлар терма жамоаси сафида 108 та ўйин ўтказиб 15 та гол киритишга муваффақ бўлган.

Мураббийлик фаолияти:

“Шахрихончи” (Шахрихон)
“Кимёгар” (Чирчиқ)
Хоразм (Урганч)
“Чилонзор”, “Дўстлик” каби жамоаларда иккинчи мураббий, “Пахтакор” ўринбосарлари бош мураббийи.

-   Дастлабки анъанавий саволимиз: қаерда туғилгансиз, футбол билан қай тарзда шуғулланишни бошлагансиз?

-   Тошкентда туғилганман. Герман Титов номидаги спорт интернатида ўқиганман. Бу ерда шунингдек, Михаил Ан, Владимир Федеров каби СССР терма жамоаси футболчилари ҳам тарбияланганлар. 16 ёшлигимда “Умид” номли ўзбек жамоаси таркибида ўсмирлар ўртасидаги турнирда иштирок этганман. Ўша ерда СССР ўсмирлар терма жамоаси бош мураббийи Борис Игнатьевнинг назарига тушганман.  У мени терма жамоа йиғинига таклиф қилган. Ўсмирлар жамоаси таркибида 25 га яқин мамлакатда ўйнаганман. Бу жамоада Игорь Беланов, Александр Заваров, Сергей Родионов, Сергей Краковский каби футболчилар билан тўп сурганман.

-   Барчага маълумки, ўша вақтда спорт делегацияси таркибида бошқа мамлакатларга хавфсизлик органлари ҳодимлари ҳам борарди...


-   Ҳа, делегациямиз таркибида бизга нотаниш одам ҳам бўларди. У мураббий ҳам, футболчи ҳам, маъмур ҳам эмасди. Бизга ёлғиз ҳеч қаерга чиқишга руҳсат берилмасди. Бошқа мамлакатликлар билан мулоқотга киришиш ҳам мумкин эмас эди.

-   Қачон “Пахтакор” аъзосига айлангансиз?

-   1978 йилда мени Тошкентнинг “Пахтакор” жамоасига таклиф қилишган. Жамоа эндигина олий лигага қайтган, жамоанинг ўринбосарлар таркиби ҳам шакллантирилаётган эди. Ўшанда мен билан бир вақтда жамоага Геннадий Денисов, Владимир Собиров, Равил Агишев каби футболчилар ҳам келишганди. Ўша мавсумда мен ўринбосарлар таркибида тўп сурдим. 1979 йили эса Киевда СССР мамлакатлари Спартакиадасида Ўзбекистон номидан мамлакатнинг энг кучли жамоаси “Пахтакор” иштирок этганди. Мен ўшанда илк бора асосий таркибда майдонга тушганман. Ростовнинг СКА жамоасига қарши ўйнаганмиз. Ўша ердан Польшага, мусобақада иштирок этиш учун учганмиз. Ўша мусобақада ғалаба қозонганмиз. 14 августда Москвага қайтиб борганмиз. Бизни кутиб олган журналист Лев Филатов менга уч кун олдин “Пахтакор”нинг ҳалокатга учраганини айтди... Жамоанинг фақатгина Минскка учмаган аъзоларигина тирик қолибди...

Ўшанда СССР футбол Федерацияси тошкентликлар учун имтиёз яратиб берган. Жамоа уч йил давомида қандай натижа қайд этишидан қатъий назар юқори лигадан тушиб кетмаслик имкониятини берган. Жамоага бошқа клублардан машҳур футболчилар келиб қўшила бошлаган. Булар Андрей Якубик, Зураб Церетели, Гоча ва Манучар Мачаидзе, Валерий Глушаков, Нуриддин Амриев каби футболчилар эди. Янгиланган таркиб билан 21 сентябрь куни Ереванда “Арарат”га қарши ўйинда дебют қилганмиз. Биринчи голимни эса 1981 йили Донецкнинг “Шахтёр” жамоаси дарвозасига киритганман.

-   1984 йили Олма-Отадаги “Қайрат”га қарши ўйин эсингиздами? Сиз иккита гол киритганингизга қарамасдан, ўшанда олма-оталиклар 6:2 ҳисобида ғалаба қозонган эдилар...

-   Қозоғистон ва Ўзбекистон футболи доимо бир-бирига рақобатчилик қилиб келган. “Қайрат”га қарши ўйиндаги ғалаба “Динамо” Киев устидан қозонилган ғалабадан ҳам каттароқ қийматга эга эди. Ушбу жамоалар ўртасидаги ўйинларга Республика етакчилари ҳам ташриф буюришарди. Ўша ўйиндаги мағлубият жудаям қаттиқ таъсир қилган. Ҳудди шу йили “Пахтакор” биринчи лигага тушиб кетган...
Кейин эса жамоани Иштван Секеч қабул қилиб олади. У асосий эътиборни жисмоний тайёргарликка қаратарди. Ўша вақтда менга ҳарбий хизматдан чақирув келади ва мен “ҳизмат”га биринчи лиганинг “Звезда” жамоасига кетганман. У ерда кўп қолмаганман: жамоа бош мураббийи, машҳур Геннадий Красницкий билан юзага келган тушунмовчиликлар натижасида у мени ҳақиқий ҳарбий хизматга, Туркманистоннинг Қизил-Арват шаҳрига юборган. Кейин Хоразмнинг “Хонқа”, Венгриянинг МТК жамоаларида тўп сурганман.

-   Футболчилик фаолиятингизда етакчи жамоалардан ҳам таклифлар тушганмиди?

-   Ўсмирлар терма жамоасида ўйнаб юрган вақтимда Москванинг “Динамо” ҳамда “Торпедо” жамоалари ўз таркибига чорлашган. Лекин, мен Ўзбекистондан кетишни ҳаёлимга ҳам келтирмаганман. У вақтда партия билан боғлиқ сабаблар туфайли кетиш қийин эди.

-   Бутсаларингизни михга илгандан сўнг нима билан шуғулландингиз?

-   Мураббийлик курсларини якунлаб, лицензия олдим ва 1995 йили Ўзбекистон 1 лигасининг “Шаҳрихон” жамоасини қабул қилиб олдим. Кейин Чирчиқнинг “Кимёгар”, Тошкентнинг “Чилонзор” жамоаларида ишлаганман. 1999 йили эса Олий Лиганинг “Хоразм” жамоаси бош мураббийи сифатида фаолият бошладим. Биз ўшанда чемпионатда жуда яхши иштик этиб 5-ўринни эгаллагандик. Таркибида Миржалол Қосимов, Игор Шквирин, Александр Хвостунов, Николай Ширшов, Андрей Акопянц каби футболчилари бўлган “Пахтакор”ни уйда ҳам сафарда ҳам мағлубиятга учратгандик.
Кейин эса “Дўстлик”да Леонид Остроушкога Ўзбекистон чемпиони бўлишида ўз ҳиссамни қўшганман.

- Қандай қилиб Карагандага келиб қолгансиз?

- Мен Ўзбекистондан бошқа жойда ҳам мураббийлик фаолиятимни олиб боришни истардим. Шу мақсадда Карагандага келдим. Фаолиятим ўхшамади. Кейин эса спорт буюмлари дўкони очишга қарор қилдим.
Караганданинг фаҳрийлар мини-футбол жамоасида тўп сураман. Айни пайтда “Адмирал-Спорт” фирмасининг Козоғистондаги расмий дилериман.

- Қозоқ футболининг ривожланиши ҳақида нима дея оласиз?

- Қозоғистон футболи олдинга катта қадам ташламоқда. “Шахтёр”нинг ўтган йилги еврокубокдаги иштироки бошқа жамоаларга ёрқин намуна бўлди. Ривожланиш борлиги кўриниб турибди.


sports.kz сайти асосида Азиз Тўхтамуродов тайёрлади