Киберфутбол: PCFLнинг Қашқадарё ва Сурхондарё вилоятлари учун саралаш босқичи бўлиб ўтди

Қарши шаҳридаги "Насаф" стадионида ўтказилган саралаш баҳсларида 24 нафар киберфутболчи қатнашди.

Ушбу иштирокчилар 4 гуруҳга бўлинди.

Ўз гуруҳида биринчи ва иккинчи ўринни эгаллаганлар чорак финалга йўлланма олишди.

Кеча "Насаф" киберфутболчиларига айланган Турдиқулов Илҳом ва Умаров Ҳислат ярим финалда бир-бирига рақиб бўлди.

Ушбу қарама-қаршиликда Турдиқулов Илҳомнинг қўли баланд келди. Иккинчи ярим финалда эса Ҳайрутдинов Ойбек Муродов Акмални мағлуб этди. "Насаф" киберфутболчиси финал учрашувида Ойбекни таслим этиб, саралаш ғолибига айланди. Ярим финалгача етиб келган барча ўйинчилар Гранд финал йўлланмаларига эга бўлишди.

1-ўрин. Турдиқулов Илҳом ("Насаф").

2-ўрин. Ҳайрутдинов Ойбек.

3-ўрин. Умаров Ҳислат ("Насаф").

4-ўрин. Муродов Акмал.

"Virtual Football" компанияси саралаш ўйинларини ўтказишда яқиндан ёрдам берган "Насаф" футбол клуби, "Насаф" стадиони ҳамда қолган барча инсонларга ўз миннатдорчилигини билдиради.

Вилоят ва шаҳар саралаш ўйинларида ғолиб бўлганлар Республика Гранд финалига йўл олади. Гранд финалда кучли 20 таликка кирган иштирокчилар автоматик равишда Олий лигада қатнашиш ҳуқуқини қўлга киритишади. Кучли 40 таликка кирган қолган 20 иштирокчи эса биринчи лига қатнашчисига айланади.

Иккала лига ўйинлари профессионал футбол каби 7-8 ой давом этиши ва телевидения ҳамда барча ОАВларда ёритиб борилиши режалаштирилган.

Ушбу лойиҳадан мақсад Ўзбекистон футболи ривожига ҳисса қўшиш орқали ёшларнинг бўш вақтини мароқли ва мазмунли ўтказишга ёрдам бериш. Шу билан бирга киребфутбол бўйича Ўзбекистон байроғини жаҳон ареналарида баланд кўтариш.

Эслатиб ўтамиз, киберфутбол баҳслари FIFA 16 ўйини бўйича PS4 (PlayStation 4) консолида ўтказилади.

Тошкент шаҳри ва бошқа вилоятлар саралаш ўйинлари ҳақида батафсил маълумотни бу ерда олишингиз мумкин: Барча вилоятлар саралаш босқичи муддатлари