Жакарта-2018. Ўзбекистон спорт делегациясининг янги экипировкалари намойиш этилди + ФОТО

Бугун Миллий олимпия қўмитасида қитъада тўрт йилликнинг энг нуфузли мусобақасида иштирок этадиган Ўзбекистон спорт делегацияси учун тақдим этилган либослар тақдимоти ташкил қилинди.Спортчиларимиз учун янги экипировкалар Хитойнинг "QIERTE Co. Ltd" компанияси томонидан PRES-JOG бренди билан тақдим этилган.

"Спорт экипировкалари тайёрланиш жараёнида Осиё ўйинлари бўлиб ўтадиган мамлакат - Индонезиянинг иқлими ҳам ҳисобга олинган. Хусусан, Жакарта ва Палембангда тез-тез ёмғир ёғишини ҳисобга олиб, капюшонли кийимлардан ва сув шиммайдиган матолардан спорт экипировкаларини ишлаб чиқарилди. Спорт либоси тўқ кўк ва оқ ранглардан ташкил топган. Шунингдек, ундан Ўзбекистон Миллий олимпия қўмитасининг рамзи ҳам ўрин олган. Спортчиларимиз нафақат мусобақа давомида, балки кундалик ҳаётда ҳам фойдаланишлари учун минимализмга алоҳида эътибор қаратилган", - дейилади МОҚ пресс-релизида. Эслатиб ўтамиз, мусобақанинг тантанали очилиш маросими 18 август куни Жакартада бўлиб ўтади. Осиё ўйинларида юртимиз шарафини 232 нафар спортчи 30та спорт турида ҳимоя қилади.

Футболчиларимиз киядиган либос.

Шунингдек, бугун МОҚда Осиё ўйинларида иштирок этадиган спортчиларимизни кузатиш маросими ҳам ўтказилди.