Ҳаким Фузайлов: "Хоразм"ни Суперлигада олиб қолишга ҳаракат қиламиз, бошқа йўлимиз ҳам йўқ"

"Биринчи навбатда бугун стадионни байрамона ҳолатга тайёрлашганини айтиб ўтмоқчиман. Ютқазганимиз аламли бўлди, албатта. Умуман олганда "Қизилқум" қарши ҳужумларга таянишини ва "автобус" қўйишини билар эдик. Бугун нафақат ҳимоя, балки ярим ҳимоячиларимиз ҳам кутилган ўйинни кўрсата олишмади. Биз яратган вазиятларимиздан фойдалана олмадик, рақиб эса имкониятни қўлдан бой бермади. Мухлислар, раҳбариятга байрам тақдим қилмоқчи эдик, лекин бу - футбол. 

Бу йил кўплаб ўйинларда мухлислар қаршисида ўйнадик. Йигитларга ҳаяжонга берилмасликни айтгандим. Илк дақиқалардан хатоларга йўл қўйдик. Биринчи бўлимдаёқ ўзгариш ҳам қилмоқчи эдим. Қайсидир маънода ўзимизга ўхшамадик. Жамоамиз ҳар бир ўйинда футбол ўйнамоқда, ҳаракат қилмоқда. 

- Майдон чими борасида фикрингиз. Бу жамоага устунлик берадими?

- Бу ҳақида гапириш қийин, чунки эртага Тошкентга йўл оламиз ва табиий майдонда ОКМКга қарши тайёрланамиз. Бу ерга сунъий майдонга қайтдик, бу ўзига яраша қийин. Рақиб бир кун олдин келиб машғулот ўтказиб ютиб кетди. Сунъий майдон кейин табиий мослашишда муаммолар бўлиши мумкин. Бугунги ўйин кўрсатдики ўйнаш ва ютиш ҳам мумкин. Жамоани Суперлигада олиб қолишга ҳаракат қиламиз. Бошқа йўлимиз қолмаган.