Гёкереш "Спортинг" учун бошқа ўйнамаслигини маълум қилди. Клуб футболчига берган ваъдасини бажармаган

Виктор Гёкереш ўртадаги эркакча келишувни бузгани учун "Спортинг"дан ғазабланган. Аввалроқ хабар қилинганидек, Швеция терма жамоаси ҳужумчиси "Спортинг" билан ўз нархини 70 миллион еврога туширишга келишиб олган эди, чунки у 2023 йилда ваъда қилинган шартни бажарди - чемпионатда бир мавсумда камида 20 та гол урди. Виктор 29 ва 39 та гол билан икки марта Португалия чемпионатининг энг самарали тўпурари бўлди.

Record нашри хабар беришича, Гёкереш клубдан ғазабланган ва кўнгли қолган, чунки "Спортинг" жентлменча келишувни бузган. Футболчи "Спортинг" ҳақидаги маълумотларни ижтимоий тармоқларидан ўчириб ташлади ва клубга энди унинг сафида ўйнамаслигини маълум қилди.

"Спортинг" президенти Фредерику Варандаш баёнот бериб, вазиятни тушунтирди:

"Мен Гёкерешнинг 60 миллион евро ва қўшимча 10 миллион евро эвазига кетмаслигига кафолат бера оламан, чунки мен ҳеч қачон бундай ваъда бермаганман. Ҳозиргача клубга Виктор бўйича ҳеч қандай расмий таклиф келмаган.

Унинг агентининг энг катта хавотирларидан бири биз шартномани бекор қилиш бандини бажаришни талаб қилишимиз эди. У баъзи масалаларда кафолатга эришмоқчи бўлди.

Хўш, нима келишиб олинди? "Спортинг" энди товон пули сўрамайди. Бунинг сабаби: Гёкереш яқинда 27 ёшга тўлиши керак эди ва дунёдаги ҳеч бир ўйинчи Португалияни 27 ёшида 100 ёки 90 миллион еврога тарк этмайди.

Ўша учрашувда агент суммани келишиб олмоқчи бўлди. Мен шундай дедим: "Аниқ нарх белгилашимиз шарт эмас, чунки бир йилдан кейин нима бўлишини билмайман. 40, 60 ёки 80 миллион евро бўладими, айтолмайман. Мен кафолат бера оладиган ягона нарса шуки, 100 миллион евро талаб қилмайман," дейди клуб президенти.

Эслатиб ўтамиз, Гёкерешни трансфер қилишга номзод сифатида МЮ ва "Арсенал" клублари тилга олинган эди.