Григорий Колосовский: "Энди биз майдонга чиқадиган ҳар бир ўйин финал бўлиши керак"

Ўйин ҳақида

- Гувоҳи бўлганингиздек, оғир ўйин ўтказдик. Учрашув бошидаёқ четлатишга дуч келганимиз режаларни ўзгартириб юборди. Қарши ҳужумларда омадимизни синаб кўришга ҳаракат қилдик. Битта зўр вазиятимиз бўлди, гол урганимизда бошқача ўйин бўларди.

- Натижа сизни қониқтирдими?

- Натижа борасида айтсам, албатта йўқ. Лекин ўйин борасида қониқдим десам ҳам бўлади. Чунки биз деярли икки бўлим камчилиа бўлиб ўйнашга мажбур бўлдик. Ишлашимиз керак бўлган жиҳатлар бор, бугун кўриб олдик ва таҳлил қиламиз.

- Қизил карточка кўрсатилган вазиятга муносабатингиз?

- Вазиятни тўғридан-тўғри кўрмай қолдим. Бу футбол ва унда мана шунақа ўйин эпизодлари ҳам бўлиб туради. Видео такрорни кўриб, хулоса чиқарамиз.

- Жамоадаги мавжуд таркибдан қониқиш ҳосил қилаяпмизми?

- Жамоада ёмон йигитлар жам бўлмаган. Айтиб ўтганимдек, ишлашимиз керак бўлган жиҳатлар бор. Масалан бугун яхши ҳимояландик, бу умумий ўйин сифатига ва натижага таъсир қилди. Таҳлил қиламиз, жамоани кучайтириш борасида ишлаймиз.

- "Металлург"ни Суперлигада олиб қолиш учун фурсат етарлими?

- Бугун ўз майдонимизда асосий рақиблардан бири билан ўйинда ғалабага эриша олмадик. Исталган мураббий бундай натижадан қониқмайди. Жамоани Суперлига олиб қолиш учун энди биз майдонга чиқадиган ҳар бир ўйин финал бўлиши керак. Зиммамиздаги вазифа шунга қаратилган. Олдиндаги ўйинларда ижобий натижаларга эришиб, мақсад томон интиламиз.