Гондурас ўсмирлари U17 мундиалларда қандай иштирок этган?

Энди ўсмирларимиз 28 октябрь куни Гондурас ўсмирлари билан беллашишади. Ғолиб чорак финалга йўлланмани қўлга киритади.

Рақиб жамоанинг ўтган мундиаллардаги иштироки ва ҳозирги мусобақада кўрсатган натижалари билан таништиришга қарор қилдик.

Гондурас ўсмирлар терма жамоаси илк бор 2007 йилги мундиалда иштирок этган.

Жанубий Кореяда бўлиб ўтган Жаҳон чемпионатида дебют қилган Гондурас ўсмирлари гуруҳдаги барча ўйинни бой беришган. Испанияга 2:4, Аргентинага 1:4 ва Сурияга 1:2 ҳисобларида имконият бой берилган. Шу тариқа гондурасликлар гурҳда 0 очко билан сўнгги ўринни банд этишган.

2009 йилги Нигерия мезбонлик қилган ўсмирлар ўртасидаги Жаҳон чемпионатида Гондурас "A" гуруҳида иштирок этган. Қизиғи бу сафар ҳам жамоа ортига очкосиз қайтган. Аргентина (0:1), Нигерия (0:1) ва Германия (1:3) каби кучли рақиблар олдида Гондурас ҳеч нима қила олмаган.

2011 йилги мундиалга Гондурас чиқа олмаган.

Ҳозир давом этаётган Жаҳон чемпионатида Гондурас ўзининг дастлабки очколари ва ғалабасини қўлга киритгани эътиборга молик.

"A" гуруҳининг 1-турида мусобақа мезбони БАА устидан 2:1 ҳисобида зафар қучган Гондурас кейинги турда Словакия билан дуранг ўйнади - 2:2. Сўнгги турда ЖЧ ғолиблигига бош даъвогар деб ҳисобланаётган Бразилияга имконият бой берилди - 0:3. 4 очко олган Гондурас гуруҳда иккинчи ўринни банд этди.

ЖЧ-2013да жамоанинг урган тўртта голига тўртта футболчи муаллифлик қилди: Фреди Медина, Хорхе Бодден, Рембрандт Флорес ва Брайн Веласкез.