Футзал. Бруно Гарсия: "Вьетнам Осиё чемпионатига тайёр"

Кеча Ўзбекистон ва Тожикистон терма жамоалари ўртасидаги ўртоқлик учрашувини Вьетнам бош мураббийи Бруно Гарсия кузатиб борди. "C" гуруҳида Тожикистон, Таиланд ва Хитой Тайпеи билан кураш олиб борадиган Вьетнам устози бўлажак рақиблари ҳақида маълумот тўплади. Биз фурсатдан фойдаланиб испаниялик мураббийнинг фикрлари билан қизиқдик.

"Ўзбекистонга бугун, 28 январь куни етиб келдик, - деб гап бошлади Бруно Гарсия. Осиё чемпионатига тайёргарликни шу ерда давом эттирамиз. Айни пайтда Ҳошиминда 35 даража иссиқ, Тошкентда эса деярли 0 градус экан. Шу боис ҳам шогирдларим маҳаллий иқлимга мослашишлари учун қитъа чемпионати бошланишига 14 кун қолганида юртингизга етиб келдик".

"Гуруҳимиздан ўрин олган Тожикистон терма жамоасининг Ўзбекистонга қарши ўйинини томоша қилдим. Тожикистон сафида индивидуал тарзда кучли футзалчилар кўп, лекин тактик қўлланмалар йўқлигини сездим. Масалан, Ўзбекистонда тактик қўлланмалар кўплиги кўзга ташланди".

"Вьетнам Осиё чемпионатига тайёр. Тактик кучимиз орқали рақибларнинг жисмоний кучини енгишга ҳаракат қиламиз. Гуруҳдаги барча рақибларни ҳурмат қиламиз. Квартетимизда Таиланд фаворит. Хитой Тайпеи ҳам ўзига яраша кучли терма жамоа ҳисобланади".

"Тошкентга келганимизда қалин қор ёққанини кўрдик. Мен испанияликман олдин ҳам қорни кўп кўрганман (кулади). Шогирдларим эса бундан ҳайрон қолишди. Бир йил олдин Хорватияга йиғин ўтказишга борганимизда футзалчиларим биринчи бор қорни кўришганди", - дейди Вьетнам терма жамоаси бош мураббийи.