“Футбол шарҳи” кўрсатуви Наманганда

Ушбу кўрсатув ижодкорлари айни пайтда Наманган шаҳрида меҳмон бўлиб туришибди. Зафар Имомхўжаев бошчилигидаги ижодий гуруҳ аъзолари сафар давомида Наманган вилояти телерадиокомпанияси ижодкорлари билан ҳамкорликда навбатдаги кўрсатув учун лавҳалар тайёрлашмоқда.

Хусусан кеча ижодкорлар яқиндагина фойдаланишга топширилган “Навбаҳор” ўйингоҳида бўлишди. “Футбол шарҳи Наманганда” деб номланган кўрсатувда Наманган вилоят ҳокимлиги спорт ва маданият ишлари бошқармаси бошлиғи, “Навбаҳор” футбол клуби вице-президенти Расулжон Низамбаев билан суҳбат уюштирилди.

Суҳбат чоғида, вилоят спорти, яқинда якунига етган “Баркамол авлод-2014” спорт мусобақаси ҳамда “Навбаҳор” футбол клубига оид мавзулар кўтарилди. Шу билан биргаликда, Зафар Имомхўжаев “Навбаҳор” футбол клуби ижрочи директори Ғанишер Исмоиловдан ҳам кичик интервью олди.

Ушбу кўрсатув “Спорт” телеканали орқали яқин кунлар ичида мамлакатимиз мухлислари ҳукмига ҳавола этилади.