Фозил Мусаев "Металлург" аъзосига айланди

"Тошкент вилоятида таваллуд топиб, номдор футболчилардан бирига айланган, кўп йиллар Ўзбекистон терма жамоаси шарафини халқаро майдонларда ҳимоя этган Фозил Мусаев янги мавсумда “Металлург” жамоаси либосида майдонга тушадиган бўлди. “Металлург” ПФК ўз таркибига тажрибали ярим ҳимоячини қўшиб олди.

Фозил Мусаев 1989 йилнинг 2 январь санасида Тошкент вилоятида таваллуд топган. Футболчилик фаолиятини Қаршининг “Насаф” жамоасида бошлаган. Кейинчалик мамлакатимизнинг “Машъал”, “Бунёдкор”, “Локомотив”, “Турон” жамоаларида ўйнади. Қатарнинг “Ал Муаттар”, Эроннинг “Сепахон”, Япониянинг “Жубило Ивата” жамоалари шарафини ҳимоя этди. Хориждаги фаолиятини ҳам қўшиб ҳисоблаганда кучлилар сафида 278 та ўйинда майдонга тушиб, 23 та гол урган ва 42 марта огоҳлантирилган.

33 ёшли ўйинчи Ўзбекистон вице-чемпиони (2011, 2014), Ўзбекистон кубоги соҳиби (2014), мамлакат кубоги финалчиси (2011, 2012), суперкубок финалчиси (2014), Эрон Ислом Республикаси чемпиони (2014/15),  ОФК кубоги соҳиби (2011) бўлган. Ўзбекистон ўсмирлар (2007-2008), ёшлар (2009-2011) ва миллий (2009-2015) терма жамоалари сафига мунтазам жалб этилган", – дейилади клуб расмий хабарида.

Маълумот учун, Мусаев ўтган мавсумда "Турон" сафида 20 ўйинда майдонга тушиб, 2 та гол урди ва 4 та сариқ карточкага лойиқ кўрилди.