Достонбек Ҳамдамов: “Бугунги рақиб биздан кучли эмасди”

Ўйин ҳақида

- Аввало учрашувга ташриф буюриб, қўллаб-қувватлаб турган мухлисларга рахмат айтаман. Ғалаба учун астойдил ҳаракат қилдик. Бироқ, қанча уринмайлик, тўп дарвоза тўрига кирмади. Навбатдаги учрашувларга янада жиддий тайёргарлик кўрамиз.

- Бугунги учрашувда “Ал Васл” устунлик билан ўйнагандек кўринмади. “Пахтакор”га ғалаба учун нима етишмади деб ўйлайсиз?

- Тўғри айтдингиз, бугун рақибимиз биздан кучли эмасди. Тенг курашлар остидаги ўйин бўлди. Биргина стандарт вазиятдан гол ўтказиб юбордик. “Ал Васл” яққол голли ҳужум ташкил қила олмади.

- “Пахтакор”нинг Элит Чемпионлар Лигасидаги мақсади қандай?

- Ҳар бир ўйинда ғалаба қозониш мақсадимиз бор. Шу мақсад йўлида барчамиз ҳаракат қиламиз.

- Суперлигада “Насаф” очколар борасида илгарилаб кетди. Нима деб ўйлайсиз, “Пахтакор” бу йилги мавсумда чемпион бўла олмайдими?

- Ҳозирдан бундай деб ҳисоблаш тўғри бўлмайди. Биз албатта ҳаракат қиламиз. Мавсум якунида қайси жамоа чемпион бўлиши аниқ бўлади.