«Динамо»: Азамат Бобожонов клубни тарк этди

Илҳом Шарипов бошқарувидаги жамоа Самарқанддаги икки кунлик машғулотлардан кейин Ургут тумани тоғ ён бағридаги Омон-Қўтон ёзги қароргоҳида тайёргарликни бошлади. Жамоа таркибида ўзгариш юз берган. 28 ёшли яримҳимоячи Азамат Бобожонов клубни тарк этди. Футболчининг биринчи даврадаги ўйинлари жамоани қониқтирмагани боис, томонларнинг келишувига кўра, шартнома бекор қилинди.

«Динамо» жамоаси 21 июль, пайшанба куни яна Самарқандга қайтиб, тайёргарлик босқичи доирасида ўртоқлик учрашувида майдонга тушади. Шу куни мамлакатимизнинг кучли клубларидан бири Қаршининг «Насаф» жамоаси Самарқандда меҳмон бўлади. Назорат ўйини «Динамо» стадионида бўлиб ўтади.

Шунингдек, 25 июль куни Олий Лиганинг яна бир вакили Ғузорнинг «Шўртан» клуби билан ҳам Самарқандда назорат баҳси ўтказилиши режалаштирилган. Ушбу назорат баҳсларида айрим футболчиларга имконият берилиб, жамоа таркибида навбатдаги ўзгаришлар бўлиши мумкин.