Александр Хомяков: "Жамоамиз характер кўрсата олди"

- Ўйин ҳақида фикрингиз?
- Қийин баҳсни ўтказдик. Фурсатдан фойдаланиб клубимиз раҳбарияти, мухлисларни ва ҳаммани бугунги ғалаба, эртанги Ҳайит байрами билан табриклайман. Яна ўйинга қайтадиган бўлсак, осон бўлмаган ғалабани қўлга киритдик. Жамоамиз характер кўрсата олди. Охиригача кураш олиб боришгани учун футболчилларга раҳмат айтиб қоламан.

- Сиз қайси клубда ишламанг доим характерли жамоа шакллантиришга урингансиз ва бунинг уддасидан чиққансиз. Бугун ҳам жамоа рақибни кучли характер эвазига мағлуб этганини айтиб ўтдингиз. Танаффусда йигитларга нима дедингиз?
- Ҳар доим биринчи таймдан сўнг футболчиларга гапирамиз. Бугун ҳам шундай бўлди. Албатта, айнан нима деганимни сўзма-сўз айтишнинг ҳожати бўлмаса керак. Биз нимада ютқазаётгандик ва нимани тўғрилашимиз керак эди. Шулар ҳақида гапирдик. Иккинчи голни уриб олганимиздан сўнг ўзимизга бўлган ишонч ортди. Тўп назоратини йўқотмасликка ҳаракат қилдик. "Динамо" ўз ўйинини намойиш этди. Очиғини айтишим керак, бугун омад ҳам биз томонда бўлди. 

- Жамоанинг бу йилги мақсади ҳақида...
- Мақсадимиз улкан деб катта гапириш керакмас. Футболда битта ўзгармас мақсад бўлади: майдонга чиқиб ғалабага ҳаракат қилиш ва мухлисларни хурсанд этиш. Биз уларга ёқадиган ўйин ва натижа кўрсатишимиз лозим. Ҳозирча фақат ҳар бир ўйинда охиригача курашамиз деб ваъда бера оламан.

- Хомяков "Динамо" ва Абрамовга сюрприз тайёрламоқда мавзусидаги видеоларни ижтимоий тармоқларда кўрдик. Иккинчи таймдаги ўйин рақибга сюрпризмиди?
- Йўқ. Сиз қайси сюрприз ҳақида гапираётганингизни билмайман. Шуни айтишим мумкин уятли гол ўтказдик ва тезкор гол урдик. Иккинчи голда омадимиз келди, учинчи голимиз эса ўйинга якун ясаб берди. Шунинг учун алоҳида сюрприз қилмадик.

-  Айтишларича, ПФЛ кейинги ўйинларда бу майдонда футбол ўйнаш ҳақида ўйлаб кўрармиш. Бу сизни хавотирга соладими?
- Майдон ҳолати борасида ҳар доим турли гапларни эшитяпмиз. Ҳамма норози. Лекин менга қолса ўз майдонимизда, ўз мухлисларимиз қаршисида тўп тепишни афзал кўраман. Мухлислар биз билан эканлигини доим ҳис қилиб туришимиз керак. Ҳозир чемпионатда қисқа танаффус юзага келади. Менимча, майдон ҳолатини яхшилаш устида иш олиб борилса керак.

- Ғалабадан кейин мухлисларга нима деган бўлардингиз?
- Ишқибозларни мамнун этганимиздан хурсандмиз. Биз доим бирга эканлигимизни футболчилар жуда яхши тушуниб турибди ва бу муҳим роль ўйнайди.

- Ўйиндан олдин рақибни қанчалик ўргандингиз?
- Ҳамма қатори биз ҳам рақибларни ўрганиб чиқамиз. "Динамо"да ўйин охирларига бориб интенсивлик пасайиб кетишини билардик. Лекин бугун интенсивлик пасаймади. Ҳисоб 3:1 бўлгач, ўйин охирларида ҳам "Динамо" фаол ҳаракат қилди. Лекин барибир рақибнинг кучсиз томонларини ўрганиб иш олиб боришга ҳаракат қиламиз. Сифатли таҳлил сифатли тайёргарлик учун қўл келади. Олдимизда узоқ йўл бор. Ишлайдиган жиҳатларимиз кўп. Паузадан фойдаланиб хатоларни тўғрилашга ҳаракат қиламиз. Ҳар доим ҳам бир хил характерда майдонга чиқишнинг иложи йўқ. Лекин доим чиройли натижа кўрсатишга интиламиз.