Дибаланинг Европа Лигаси финалидаги иштироки сўроқ остида

"Рома" ҳужумчиси Пауло Дибала Европа Лигаси финалида "Севилья"га қарши ўйинни ўтказиб юбориши мумкин. Бу ҳақда римликлар бош мураббийи Жозе Моуринью маълум қилди.

"Менимча, у ўйнай олмайди. Лекин ростини айтаман: умид қиламанки, у ҳеч бўлмаганда захира ўриндиғида ўтиради. Агар Пауло захира ўриндиғида бўлиб, 15-20 дақиқага майдонга туша олса, мен бундан хурсанд бўламан", – деди мутахассис.

Аргентиналик футболчи тўпиғидан олган жароҳати туфайли "бўрилар"нинг сўнгги 4 та ўйинини ўтказиб юборди. У жорий мавсум барча турнирларда 36 та ўйин ўтказиб, 16 та гол ва 8 та голли узатмани амалга оширди.

"Севилья" ҳамда "Рома" ўртасидаги Европа Лигаси финал учрашуви 31 май, чоршанба куни бўлиб ўтади.