Диас "Ливерпул"дан норози. Клуб берган янги шартнома шартлари футболчига ёқмаган

"Ливерпул"нинг Луис Диасга берган янги таклифи футболчини қониқтирмади, натижада томонлар ўртасидаги муносабатлар таранглашди. Бу ҳақда ESPN Colombia хабар бермоқда.

Манба маълумотларига кўра, колумбиялик футболчи ўзига таклиф этилаётган шартлар мерсисайдликлар натижаларига қўшган ҳиссасига мос келмаслигини таъкидламоқда. Шу билан бирга, ҳозирги кунда Диасга энг катта қизиқишни "Барселона" ва "Бавария" клублари билдирмоқда. Шу сабабларни ҳисобга олган ҳолда футболчи клубдан анча яхшироқ таклиф кутганди.

Ўтган мавсумда ҳужумчи барча мусобақаларда 50 та ўйинда иштирок этиб, 17 та гол урди ва саккизта голли узатма берди. Футболчининг клуб билан амалдаги меҳнат шартномаси 2027 йил ёзигача мўлжалланган. Transfermarkt порталида келтирилган маълумотларга кўра, футболчининг бозор қиймати 70 миллион еврони ташкил этади.