Денис Иванков "Насаф"дан кетди
29 jan 2019 16:04
News
Кўп йиллардан буён "Насаф"да дарвозабонлар мураббийи бўлиб ишлаб келган Денис Иванков жамоани тарк этди.
Рўзиқул Бердиев "Насаф"ни ўз қўлига олганидан буён узлуксиз штабда ишлаган Иванков 6 йиллик фаолиятидан сўнг ўзининг қадрдон клуби билан хайрлашди.
Ўзбекистон терма жамоасида ҳам дарвозабонлар мураббийи сифатида ишлаётган тажрибали мутахассис "Машъал" ва "Насаф"даги фаолияти орқали кўпчиликка жуда таниш.
Иванков "Насаф"даги фаолияти давомида турли ёшдаги терма жамоалар ва МТЖ даражасидаги Элдорбек Суюнов, Ўткир Юсупов ва Умиджон Эргашев каби иқтидорли посбонларни тарбиялашга муваффақ бўлди. Шунингдек, Иванков "Насаф"дан аввал ишлаган "Машъал"даги фаолияти давомида ҳам ажойиб посбонларни чиқаришда жонбозлик кўрсатган. Улардан бири Санжар Қувватов. Ўтган мавсумлар давомида устоз ва шогирд Қаршида ҳам бирга ишлашга муваффақ бўлди. Айни пайтда Иванковнинг барча шогирдлари терма жамоаларга номзод дарвозабонлар ҳисобланади.
Мураббийни кетишига сабаб эса терма жамоадаги фаолият. Иванков бор диққат эътиборини айнан мамлакатнинг бош жамоасига қаратиши боис клубдаги ишини тўхтатишга қарор қилган. Рўзиқул Бердиев эса терма жамоа манфаатини ўйлаган ҳолда ўзининг энг асосий кўмакчиларидан бирини қўйиб юборишга қаршилик қилмади. Иванков "Насаф" билан дўстона тарзда хайрлашган. "Насаф"да эса Денис Иванков учун эшиклар доим очиқлиги ва исталган пайтда "ўз уйи"га қайтиши мумкинлиги таъкидланган.
Денис Иванковнинг "Насаф"даги ўрнини собиқ дарвозабон, бунга қадар клуб академиясида дарвозабонлар мураббийи фаолиятини бошлаган Михаил Наумов эгаллаши кутилмоқда.
Similar news
![AMP Logo](https://championat.asia/image/logo-amp.png)
Comments