Даврон Файзиев: "Майдон ҳолатини мағлубиятга сабаб сифатида кўрсатмаган бўлардим"

Ушбу учрашувдан сўнг мезбонлар катта мураббийи Даврон Файзиев фикрларини билдириб ўтди.

"Ўйин ҳақида тўхталадиган бўлсам, бугун турнир жадвалидаги иккита ёнма-ён турган жамоалар ўзаро тўқнаш келишди. Биринчи бўлимда яхши ҳаракат қилдик. Тезкор гол режаларимизни бузиб юборди. Ҳимояда йўл қўйган қўпол хатоларимиз рақибнинг фойдасига ишлади. Ўйлайманки, кейинги турларда йўқотилган очколарни ўрнини тўлдиришга ҳаракат қиламиз. Иккинчи давранинг дастлабки турларини мағлубият билан бошлаш аламли албатта. Йигитлар вазиятни тушуниб турибди. Биринчи даврадаги ўйинимизни, ғалабаларни қайтаришимиз керак. Эртадан бошлаб кейинги ўйинга футболчиларимизни тайёрлашни бошлаймиз.

Биринчи таймда  вазиятлар яратдик, лекин улардан фойдалана олмадик. Иккинчи бўлимда эса рақибимиз бизни хатоларимиздан унумли фойдаланишга ҳаракат қилди ва қайсидир маънода бунга эришди. Иккинчи бўлимда яққол голли вазият ярата олмадик. Бугун биринчи бўлиб биз гол урганимизда бошқача бўларди. 

Майдонга жавобгар шахслар бор, давлат имтихонлари ўтказилгани сабаб шунақа бўлиб қолди. Бу майдонда кеча машғулот ўтказдик. Майдон холатини мағлубиятга баҳона сифатида рўкач қилиш нотўғри бўлади, чунки ҳар икки жамоа ҳам мана шу майдонда ҳаракат қилди. Давлат қабул қилган қарорга биз қарши чиқа олмаймиз. Бу баҳона бўла олмайди. 

Марказлашган чемпионатда битта ҳужумчи билан ҳаракат қилдик, бунгача уйдаги барча учрашувларда иккита ҳужумчи билан ўйнаётган эдик. Ўйин қандай натижа билан тугашини олдиндан билмайсиз. Уйда кўпроқ ҳужумкор ўйнаймиз. Мағлубиятни тан олиш ҳам мардлик ҳисобланади. Футбол шундай ўйин кимдир ғалаба қозонади, кимдир ютқазади. Ҳали олдинда 11 та тур ўйинлари бор , ўйлайманки йўқотилган очколарни ўз жойига қўйишга улгурамиз",- дейди Даврон Файзиев.