Даврон Абдураҳмонов: "Беларусь бизга қарши анча яхши тайёргарлик кўргани маълум бўлди"

- Осиё чемпионатига ташланган қуръа ҳақида нима дея оласиз?
- Гуруҳимизда осон ўйинлар бўлмайди. Барча ўйин оғир ўтиши аниқ. Чунки ҳамма жамоа Жаҳон чемпионатига чиқишни истайди.

- Гуруҳдан жой олган жамоалар ҳақида...
- Ливан ва Қирғизстонга қарши бир неча марта ўйнаганман. Қирғизистон кучли ва аҳил жамоа. Ливан ҳам ўз ўйин услубига эга жамоа. Улар бор кучи билан кейинги босқичга чиқишга ҳаракат қилишади.

- Саудия Арабистони "сирли тулпор"ми?
- Саудия Арабистони билан олдин ўйнамаганмиз. Улар "сирли тулпор" бўлишадими ёки йўқми буни вақт кўрсатади. Мусобақа бошланишига қадар мураббийлар рақиблар ҳақидаги барча маълумотларни беришади. Менимча кўпроқ Саудия Арабистонини ўргансак керак.

- Беларусь терма жамоасига қарши ўтган иккита ўйин ҳақида фикрларингиз.
- Беларусь жуда ҳам яхши шаклланган жамоа. Ўйинлар осон кечгани йўқ. Рақиб бизга қарши анча яхши тайёргарлик кўргани маълум бўлди. Биринчи ўйинда Беларусь ғалабага эришди. Лекин биз ҳам вақти келганда тезлик билан ўйин услубимизни ўзгартира олишимизни кўрсатдик ва иккинчи учрашувда зафар қучдик, - дейди Даврон Абдураҳмонов. 

Нарзулла Сайдуллаев ёзиб олди