Давралар оралиғида "Динамо"га кимлар келди-ю, кимлар кетди?

Жумладан, «Динамо» сафида ижара асосида тўп сурган Жавоҳир Қаҳрамонов («Бунёдкор»), Абдужамол Исроилов, Дамир Низанов («Нефтчи») сингари футболчилар клубни тарк этишди. Шунингдек, ярим ҳимоячи Омаджон Тайлоқов ҳам жамоани тарк этди. «Динамо» клуби ушбу футболчиларга ҳамкорлик учун миннатдорчилик билдириб, кейинги фаолиятларига омад ва зафарлар тилаб қолади.

Жамоани тарк этган футболчилар ўрнига янги футболчилар билан ҳам шартномалар имзоланди. Хусусан, «Пахтакор» клубидан черногориялик ҳимоячи Аднан Ораховац «Динамо»га ўтди. Қолаверса, ижара шартномаси асосида «Олмалиқ»дан Муҳаммад Исаев, «Металлург»дан эса Дониёр Исмоилов сингари ярим ҳимоячилар таклиф этилди.

Тошкентдаги йиғин давомида жамоа машғулотларида иштирок этган Андрей Сидоров, Артём Макарченко сингари футболчилар мураббийлар кўригидан кейин жамоани тарк этишди.

Эслатиб ўтамиз, «Динамо» Ўзбекистон Кубоги ярим финали доирасида сафарда 31 июль куни ўйин ўтказса, 5 август куни Олий Лига 16-тури доирасида Самарқандда «Металлург» жамоасига қарши саф тортади.