Владимир Назаров — Пенальтилар серияси, шпаргалка ва "Бухоро" билан финал ҳақида

Муросасиз ўтган ўйинда ғолиб пенальтилар сериясида аниқланди. Футбол лотореясида омад "шерлар"га кулиб боқди. Учрашувдан сўнг жамоа дарвозабони Владимир Назаров фикрларини билдирди.

"Барчага табрик учун раҳмат. "Пахтакор" мухлисларини ғалаба билан табриклайман. Йигитлар охиригача курашишди. Ўйин оддий ўтмади дея оламан, чунки "Динамо" ҳақиқатдан ҳам яхши жамоа эди. Бу ўйинга яхши тайёргарлик кўрган эдик. Лекин ҳаммасини пенальтилар серияси ҳал қилди",- дейди Назаров. 

- Ўйиндан олдин Павел Бугало қандайдир шпаргалка кўрсатди. Бу аввалдан тайёрланган режамиди?

- Ҳа, учрашувдан олдин дарвозабонлар билан назарий машғулотларда ким қаерга пенальти тепишини ўрганиб чиққан эдик. Қўлимизда тайёрланган шпаргалка турганди. Шу асосида пенальтилар сериясига тайёрландик. 

- "Бухоро"га қарши финалдан кутилмалар қандай?

- Ҳозир Суперлигага тайёрланамиз. Олдинда ўйинларимиз бор. "Бухоро" ҳам яхши жамоа, финалга етиб келди. 

- Охирги ўйинларда "Динамо"га қарши ўйнаш қийин бўляпти...

- Ҳамма жамоага қарши ўйнаш қийин. Бизга қарши барча икки карра куч билан майдонга чиқади. Кучсиз жамоа йўқ, ҳар бири ўзига яраша муаммо туғдира олади.