Чемпионлик тўқнашуви олдидан: "Пахтакор" футболчиси "Локо"ни шоҳсупадан туширмоқчи

Сайфиев бугунги чемпионлик тўқнашувига қиёсланаётган баҳсда жамоа тўлиқ тайёрлигини билдирди.

- "Локомотив" билан ўйинга 100% тайёрмиз. Йўл битта - ғалаба. Дуранг ҳам бизни умуман қониқтирмайди".

Суперлиганинг иккинчи босқичидаги барча учрашувларда гол ураётган ягона футболчи "Локомотив" дарвозасини ишғол этишга ҳам шайланаётганини яширмади.

- "Нафақат "Локомотив" билан ўйинда, балки барча баҳсларда гол уриш иштиёқида майдонга тушаман. Голга бўлган чанқоқлик сўнгани йўқ. Худо хоҳласа ушбу самарадорликни давом эттирмоқчиман".

Фарруҳ Сайфиев "Пахтакор" икки йилдан буён шоҳсупадан тушмаётган "Локомотив"дан чемпионликни тортиб олиши ҳақида қуйидаги фикрларни билдирди.

- "Пахтакор" айни пайтда яхши формада. Шу боисдан ҳам биз "Локомотив"ни шоҳсупадан туширишга қодирмиз, деб ўйлайман.

Фарруҳ Сайфиев "Локомотив"да "Пахтакор" хавфсирайдиган аниқ бир футболчи йўқлигини, уларни жамоа сифатида яхши шаклланганини таъкидлади.

- "Локо" жамоа сифатида яхши шаклланган. Аниқ бир футболчини ажратиб кўрсата олмайман.

- "Локомотив"да Сардор Рашидов, "Пахтакор"да Шерзод Аъзамов жароҳатлари боис ўйинни ўтказиб юборишади. Қайси бир йўқотиш ўйинга таъсир ўтказиши мумкинлиги ҳақида Сайфиев қуйидаги фикрларни билдирди.

- "Жароҳатлар футболни ажралмас бир қисми. Биз бир жамоага айланиб, Аъзамовнинг йўқлигини билинтирмасликка ҳаракат қиламиз".