Бугун футбол. "Шўртан" - "Андижон"

Олий лига. 25-тур
ШЎРТАН - АНДИЖОН
Бош ҳакам: Вадим Агишев
Бошланиш вақти: 17:00

Турнир жадвалидаги ўрни: "Шўртан" 10-ўринда (29 очко), "Андижон" 16-ўринда (16 очко)
Очколар орасидаги фарқ - 13 очко.  

Таъриф: Олий лигада қолиш учун ҳаракат қилаётган "Андижон" бугун Ғузорда "Шўртан" меҳмони бўлади. Мавсум якунига етаётган бир пайтда "Андижон" учун ҳар бир учрашув муҳим аҳамиятга эга. Биринчи даврада "Шўртан"нинг аҳволи чатоқ эди, аммо кейинчалик ғузорликлар бирин-кетин ғалаба қозона бошлашди ва турнир жадвалидаги мавқеларини анча яхшилаб олишди.

Факт: Охирги уч учрашувни кетма-кет учта ғалаба билан якунлаган "Шўртан" иккинчи даврани бирмунча яхши ўтказмоқда. Ғузорликлар оралиқ танаффусдан сўнг уйда бўлиб ўтган бешта ўйиндан тўрттасини ғалаба билан якунлашди. Буни ҳам яхши кўрсаткич деса бўлади.

Факт: "Андижон"нинг сафарда умуман омади келмаяпти деса ҳам бўлаверади. Жамоа сафарда ҳозирча фақат бир марта ютуққа эришган. Ориф Маматказин шогирдлари Фарғонада "Нефтчи"ни 2:1 ҳисобида мағлуб этиб қайтишган. Аммо ўшандан бери жамоа қаторасига бешта учрашувда ғалаба қозона олмади: бир дуранг ва тўрт мағлубият.

Факт: Андижонда кечган биринчи давра баҳсида "Шўртан" 3:1 ҳисобида зафар қучган. Голлар: Н. Йованович (52, пенальти) – М. Муродов (28), И. Таран (56, пенальти), З. Полвонов (59).