Биласизми? Маъруф Муродов дисквалификация қилинади, агар...

Бундан қайсидир клуб ютади ва яна қайсидир жамоа жабр чекади.

Жиззахнинг “Сўғдиёна” клубида ўйнаб малакасини оширган айрим футболчилар эндиликда ўзларини янада кучилироқ клубда синаб кўришга ахд қилмоқда. Ҳаттоки амалдаги шартномаси бўлишига қарамай, иккинчи жамоа билан битим имзолагани ҳам кузатилди.

Гап Маъруф Муродов ҳақида кетмоқда. Ўтган йили “Сўғдиёна” сафида ўзини кўрсатишга эришган футболчи қишки йиғинни “Нефтчи” таркибида бошлади. Ушбу клуб расмий сайтининг хабар беришича Муродов фарғоналиклар билан келишувга эришган ва томонлар ўзаро бир йиллик шартномага имзо чеккан.

“Сўғдиёна” бош мураббийи Даврон Файзиев билан бу ҳақда суҳбатлашганимизда қуйидагиларни айтиб ўтди. – Муродов масаласи ҳозирча очиқ турибди. Чунки унинг биз билан амалда шартномаси бор. Тўғри, Маъруфнинг “Нефтчи” билан ҳам битим имзолаганини эшитдим. Лекин айтиб ўтганимдек, футболчининг “Сўғдиёна” билан ҳам шартномаси мавжуд. Ҳайронман, қандай қилиб у иккинчи жамоа билан яна шартнома имзолаган экан? Бир вақтнинг ўзида иккита клуб билан шартнома тузиш футболчининг ўзига зарар. Шунинг учун олдин бу ҳақда маслаҳатлашиб ўйлаб кўриш керак. Яқинда бўлиб ўтган ПФЛ йиғилишида клублардан ўйинчиларни таклиф этаётганда, аввало ҳар икки жамоа раҳбарлари музокара ўтказинглар, тайёрига айёрлик қилмасдан дейилганди...

Аслида “Нефтчи” раҳбарияти Муродовнинг “Сўғдиёна” билан амалда шартномаси борлигини суриштирмаган ёки футболчининг ўзи бу ҳақда жиддий ўйлаб кўрмаган. Энди Маъруф Муродов ПФЛ томонидан ярим йилга дисквалификация қилиниши мумкин.

Ёдингизда бўлса, ўтган йили шу каби холат Александр Клецков ва Аҳрол Рисқуллаев билан ҳам юз берганди.