Бекзод Қодирқулов: "Ҳеч кимдан қўрқмаймиз. Фақат ғалаба учун майдонга чиқамиз"

Қизиқарли кечган ўйиндан сўнг мезбонлар устози Бекзод Қодирқулов фикрларини билдирди.

"Янги мавсумга тайёргарликни 12 январь санасидан бошладик. Йиғинимиз 3 босқичда бўлиб ўтди. Ўртоқлик ўйинлар ташкиллаштирилди. Таркибга тажрибали футболчиларни жалб қилдик. Умуман олганда ҳаммасидан кўнглим тўлди. Мавсумни яхши бошлаб олдик. 

Чемпионат старти билан табриклайман. Уйда ўйнаяпмиз. Босим ва ҳаяжон бўлади. Биринчи гол кутилмаганда дарвозамиздан ўрин олди. Кейинчалик йигитлар билан гаплашиб олдик. Иккинчи бўлимда фақат ҳужумга эътибор қаратилди. Йигитлар кўрсатмаларни бажаришди. 

Бизда ҳужумни якунлашда хатолар юз берди. Кейинги ўйинларда янада оптимал формага кириб олишади. Навбатдаги рақибларимиз Суперлигада қатнашган жамоалар. Ҳеч кимдан қўрқмаймиз. Сафар ёки уйда бўлсин, фақат ғалаба учун борамиз. Тўғри майдон ҳолати оптимал ҳолатда эмас. Бундай пайтда кўп жамоаларнинг майдонлари шундай. Бир нечта турдан сўнг жойига келиб олади. 

Суперлигага чиқишга "Машъал", "Андижон", "Бухоро", "Турон" фаворит бўлиши мумкин. Лекин футболда кутилмаган воқелар ҳам юз беради. Чўчимасдан майдонга ютуқ учун тушамиз",- дейди Бекзод Қодирқулов.