Бахтиёр Ашурматов: "Бангладешдаги мусобақагача таркиб тайёр ҳолга келади"

1:0 ҳисобида "Олмалиқ"нинг ғалабаси билан якунланган ўйиндан сўнг Олимпия терма жамоаси бош мураббийи Бахтиёр Ашурматов фикрлари билан қизиқдик.

"Очиғини айтсам бу ўйинни ташкил этишдан асосий мақсадим ўйинчилар билан яқиндан танишиб олиш эди. Ундан ташқари асосий таркибга яқин кўплаб футболчиларни кўриб олишга муваффақ бўлдим. Ветьнам билан бўладиган ўйинда ҳам барчани имкониятини билиб олиб, Бангладешдаги мусобақага  тайёргарликни давом эттирамиз. Бугун футболчилар менда ёмон таассурот қолдирмади. Уларга маҳорат етишмаганини эса айтиб ўтишим керак. Бу ўз сўзини айтди ва "Олмалиқ" маҳорат бобида Ўзбекистоннинг энг кучли клубларидан биридир. Ҳали ўйинни шакллантириш учун озгина вақтимиз бор ва бундан унумли фойдаланишимиз керак. Бангладешдаги мусобақагача  таркиб тайёр ҳолга келади" , - дейди Ашурматов.

"Ҳар битта чақирилган футболчилар таркибга керак. Мен ўйлайманки асосий таркибдан яна бир неча нафари келиб қўшилгандан сўнг ўйин ҳам кучаяди. Aсосий таркибнинг кўплаб футболчилари Ўзбекистон миллий терма жамоасида ҳам майдонга тушиб келмоқда. Ундан ташқари улар ОЧЛдан ҳам ўзини кўрсатмоқда".