Бакайоко Гаттузо билан бўлган жанжал ҳақида баёнот берди

"Бир неча ҳафтадан бери ОАВ мен ҳақимда ёзмоқда, аммо ҳеч нарса демасликка ва ишлашда давом этишга қарор қилдим. Бироқ "Болонья"га қарши баҳсда содир бўлган воқеа ҳақида матбуотда ёзилганларга жавоб беришим керак. Мени майдонга тушишни истамайдиган ва мураббий ҳамда жамоадошларини ҳурмат қилмайдиган футболчи сифатида кўрсатишларига жим қараб тура олмайман.

Ўша баҳсни захирада бошладим, аммо менга 5 дақиқа беришса ҳам боримни бериб ўйнашга тайёр эдим. Лукас жароҳат олганида майдонга тушишга тайёргарлик кўришимни айтишди. Мен тезда машғулотларга киришдим. Икки ёки уч дақиқадан сўнг майдонга тушишга тайёр эдим, аммо кейин захирага қайтишим кераклигини айтишди. Бу 23 ва 26-дақиқалар орасида содир бўлди.

Ўриндиққа қайтганимда мураббий менга мурожаат қилди ва умуман кутилмаган сўзларни айтди. Мен эса Гаттузо айтганини такрорладим. Бори шу. Келинг аниқлаштириб оламиз: Мен ҳеч қачон машғулот ўтказишдан бош тортмаганман. Ҳаммаси видеода кўриниб турибди.

Мен шунчаки жамоадошларимга ёрдам бермоқчи эдим ва буни бажаришда давом этаман. Олға, "Милан" - деб ёзди Бакайоко.

Эслатиб ўтамиз, "Милан" - "Болонья" учрашувидан сўнг Италия матбуотида Гаттузо ва Бакайоко ўртасида содир бўлган воқеа ҳақида хабарлар пайдо бўлди. Уларда айтилишича, Бакайоко майдонга чиқишдан олдин шуғулланишдан бош тортган. Шу сабабли Гаттузо Тьемуэ ўрнига бошқа футболчини туширган. Бундан ташқари Бакайоко бош мураббийни ҳақорат қилган экан.