Баҳодир Мирзаев Ўзбекистонда футболни бошқаришни такомиллаштириш мавзусида диссертация ёқлади

Жисмоний тарбия ва спорт менежменти йўналишида ёзилган диссертациянинг мавзуси тўлиқ тарзда "Ўзбекистонда профессионал футболни ривожлантиришда бошқарув механизмини такомиллаштириш" деб номланади.

Баҳодир Мирзаевга мазкур ишда Ўзбекистон давлат жисмоний тарбия ва спорт университетининг ректори, иқтисод фанлари доктори, профессор Болтабоев Маҳмуджон Рустамович илмий раҳбарлиқ қилди.

Ушбу диссертацияда қатор долзарб масалалар кўтарилган бўлиб, юртимизда профессионал футболни ривожлантиришда замонавий бошқарув стратегияларини ишлаб чиқиш ва самарали бошқарув механизмини амалиётда қўллаш бўйича бир қанча илмий тавсиялар берилган.

АГМК бош директорининг диссертациясида футболнинг бошқарув механизмини такомиллаштириш бўйича Ғарбий Европадаги футболи энг ривожланган мамлакатларнинг тажрибаси ўрганилган. Бошқарув механизмини ташкил этишда Бельгия тажрибаси энг самаралилардан бири бўлганлиги сабабли, уни ўрганишга катта аҳамият берилган. 

2000-йиллар бошида гигант терма жамоалардан орқада қолиб кетган Бельгияда, болалар-ўсмирлар футболидаги тизимни тубдан янгилаш орқали 14-15 йилда мамлакат миллий терма жамоасини дунё етакчилари сафига ФИФА рейтингидаги 66-ўриндан сўнгги йиллардаги мунтазам 1-2-ўринларга олиб чиқиш вазифаси қандай услуб ва усуллар ёрдамида уддалангани, бошқарувда қандай тактика ва стратегиялар қўлланилгани илмий ишдаги энг эътиборли жиҳатлардир (мисол учун, ФИФАнинг сўнгги эълон қилинган рейтингида Ўзбекистон ҳозир 77-ўринда).

Баҳодир Мирзаевни футбол соҳасидаги мазкур илмий муваффақияти билан табриклаймиз!