Асрор Алиқулов: “Тўпни назорат қилишимизга рақиб жамоа йўл қўймади”

Ушбу учрашувдан сўнг “Шўртан” клуби футболчиси Асрор Алиқулов ўз фикрлари билан ўртоқлашди.

“Тактик томонлама “Локомотив” клубига қаршилик кўрсата олмадик. Биринчи бўлимда 0:0 ҳисоби қайд этилган бўлса ҳам рақибларимиз ўйин тизгинини ўз қўлига олди. Иккинчи бўлимда жамоадошларимда бироз чарчоқ аломатлари сезилди. Биз кўп хатоларга йўл қўйдик, шу хатолар туфайли дарвозамиздан 3 та тўп олиб чиқдик. “Локомотив” бундай хатоларни кечирмайди. “Темирйўлчилар” таркибида жуда ҳам маҳоратли футболчилар жам бўлган. “Локомотив” ҳужумга ўтса ҳам тезда ҳимояга қайтиб олади. Бизда ҳужумга ўтишимиз учун тезлик етишмади. Шунинг учун ҳам голга тортадиган вазият ярата олмадик.

Иккинчи бўлимда майдонга тушган бўлсамда, тўпсиз югуришимга тўғри келди. 90 дақиқа майдонда тўп тепиш жуда ҳам қийин. Тўпни кўпроқ назорат қилишимизга рақиблар йўл қўйишмади. “Локомотив” 2 та голни ҳам марказдан ёриб кириб урди. Шунинг учун ҳам ўтказиб юборган голлардан сўнг марказий ҳимоя чизиғини кучайтиришга қарор қилгандик. Ўзим кўпроқ таянч ярим ҳимоясида ва ҳимоячиларга яқинроқ позицияда ўйнашга ҳаракат қилдим. Ушбу ўйинда мағлуб бўлдик. Энди 2 кун дам оламиз ва Ғузор шаҳрида йиғилиб кейинги ўйинга жиддий тайёргарлик кўрамиз. Чемпионат рейтингига қарасак, ушбу мағлубиятдан сўнг бироз пастги поғонага тушиб қолдик. Кейинги турда уйимизда “Нефтчи” жамоасини қабул қиламиз, ўйлайманки ушбу ўйинда ғалаба қозонамиз”, - дейди “Шўртан” клуби футболчиси Асрор Алиқулов.

Жаҳонгир Сотволдиев.