"Арсенал" баскетболчи учун 80 миллион евро тайёрламоқда

Словениялик "Арсенал"дан кўп нарса кутяпти

Артета "Лейпциг" ҳужумчисининг ўйинига бефарқ эмаслигини анчадан буён очиқ айтиб келади. Лондондаги сартарошлар ҳам шаҳарга Шешко келиши эҳтимоли юқорилигини яхши билишади. Беньямин таниш "барберга" музокаралар ҳақида айтиб қўйди, у эса буни сир тутишни истамади ва ўзининг танишларига маълум қилди. Қатор манбалар чиндан ҳам музокаралар кетаётгани ҳақида хабар бермоқда. Шешко "Арсенал"нинг ижтимоий тармоқлардаги саҳифаларига обуна бўлди, бу эса одатда трансфер масаласи ҳал дегани. Бироқ ҳозирча якуний келишув ҳақида маълумот йўқ.

Йигирма икки ёшли ҳужумчи "Арсенал"ни болаликдаги орзуси деб билмайди, шунинг учун кафолатлар истамоқда. Келишувга у товон пули бўйича банд қўшилишини талаб қилмоқда. Инглиз клублари одатда бундай йўлдан кетишмайди, испанлар эса иқтидорли футболчисининг товон пулини бир миллиард евро қилиб белгилаб қўяди ва қарабсизки, шартномада товон пули бор, аммо агар клуб футболчи билан хайрлашишни истамаса, ундан айтарли наф йўқ. "Барселона" бир марта Неймарнинг отаси томонидан уюштирилган ҳийласига учиб, 222 млн еврони ҳеч ким тўлай олмаслигига ишониб, панд еганди. Ўшанда ПСЖ нафақат иқтидорли бразилиялик футболчини, балки исталган рақиб ҳимоясини ёриб ўтаётган "Барселона" триосини "йўқ қилганди". Неймарнинг оиласи эса чамаси, аввалдан шунга яқинроқ режа билан ҳаракат қилган.

Шешко "Арсенал"да омадли ўйин кўрсатиб, Беньяминни "Реал", "Бавария" ва "Барселона" сингари катта клублар чақирса, чиқиш эшиги бўлишини истамоқда. Бир неча йилдан кейин Левандовски ва Кейн истамаса ҳам нафақага йўл олади. Шешко АПЛдан кейин балки уларнинг ўрнини эгаллаши мумкинлигини тушуниб турибди. Ҳозирнинг ўзида эса у қанчалик иқтидорли бўлмасин, Мюнхен ва Барселонада жой йўқ, шундай экан "Арсенал" вариантига мурожаат қиламиз. "Канонирлар" Беньямин содда, ёш йигитча эмаслигини тушуниб бўлди, футболчи яхшигина маош сўраган. Қизиғи, Артета параллель равишда Гёкереш бўйича ҳисоботларни ўрганиб чиқмоқда.

Мураббийлар словениялик ва швециялик турли типдаги ўйинчилигини таъкидлашмоқда. "Спортинг" Португалия чемпионатида кўпинча биринчи рақам бўлиб ҳаракат қилиб, тўп билан муомалада бўлишига қарамай, Виктор кўпинча офсайд чизиғида ўйнайди. Артета "Арсенали" эса рақибни чалғитиб, ҳимоя чизиғи бўшашиб, хотиржамликка берилганда кутилмаган зарба беришни хуш кўради. Ҳужумчи нозик ҳаракатлар қила олса ва тўп билан муомалада муаммога дуч келмаса, айниқса, тўпни назорат қилиш фойдали бўлади. Гёкереш кучига кўпроқ таянади, Шешко эса кўпроқ яккакурашга кирмай, рақибдан қочишни маъқул кўради. Айтиш мумкинки, Беньямин тана тузилиши ва ишончли ҳаракатларига қарамай, ўзини нозик футболда яхшироқ ҳис қилади.

Майдонда Эдегор, Райс ва Сака учун Шешко денгиздаги маёқ вазифасини бажаради

Осонликча фикридан қайтмайдиган Артета ҳужумчилар масаласида Берта каби спорт директорига эга бўлди. Ҳозирча "Арсенал" фақатгина голкипер Кепа билан келишувга эришди, испаниялик дарвозабон тиббий кўрикдан муваффақиятли ўтишга ҳам улгурди. Энди жамоада дарвозабонлар коллекцияси бор, лекин битта ҳам соф "тўққизинчи рақам" йўқ. Берта аввалроқ "Атлетико"да ишлаган ва чинакам зўр форвардларни топишни билади. "Арсенал" "Манчестер Сити"дан Альваресни ололмасди, сабаби аргентиналик АПЛда "шаҳарликлар" рақиблари сафида тўп тепишни истамади.

Ҳозир Хулиан Мадридда ўзини яхши кўрсата олгач, "Ливерпуль" ва бошқа топ клублар эътиборини ўзига қаратган. Шешко ҳам анчадан буён шу каби рўйхатларда қайд этилади, лекин Беньямин анча вақт совринсиз жамоалар билан музокара ўтказишни ва улар билан йўллари кесишишини истамади. Ўтган мавсум словениялик учун айниқса синовли бўлди, "Лейпциг" учун ҳам қийин кечган мавсумда Бундеслига доирасида ҳужумчи 13 та гол урди. Бу қишда "Манчестер Сити"га кўчиб ўтган Мармушдан 2 тага кам. Бўйдор Шешко "Ред Булл" ҳужумида Опенда ва Симонс билан учликда ҳаракат қилди.

Словениялик кўплаб юртдошлари каби баскетбол мухлиси. Деярли икки метр бўйли ҳужумчи анча баланд сакрай олиши билан ҳам эътибога тушган. Ким билади дейсиз, балки замонавий футболчилардан фақатгина Роналду ундан баландроқ сакрай олар. Шунга қарамай, Беньямин доим ҳам фақатгина жарима майдончасида ҳаводан узатилган тўпларни кутмайди. Артетани шу билан бирга Шешконинг ҳимоявий ҳаракатларда иштирок этишни истамаслиги ўйлантирмоқда. "Реал"нинг янги бош мураббийи Хаби Алонсо унинг жамоасида ҳамма, ҳаттоки Винисиус ва Мбаппе каби супер юлдузлар ҳам прессингда қатнашиши шартлигини юз марта такрорлаб улгурди.

"Арсенал" ҳам анча юқори ҳимояланади, Артета Шешко майдонда шунчаки тўпни кутишига жим қараб турмаслиги аниқ. "Тўққизлик" сотиб олиш фикри эскириб ҳам улгурди десак, муболаға бўлмас. Бироқ Шешко варианти омадли чиқиши мумкин, айниқса, агарда словениялик АПЛ тўлқинига тушиб ололса ва ажойиб статистика кўрсатса. Ўтган мавсум ҳужум чизиғи вакиллари жароҳатидан кейин "Арсенал"  бу нуқтада Меринони ўйнатди. Эдегор, Райс ва Сака олдинда марказий форвард ролида Шешко бўлса, ассистлари сонини ошириши анча осонлашади.

Артетанинг иккиланиши жамоани чемпионликдан узоқлаштирмоқда

Охирги йилларни умумий олсак, "Арсенал" Слотнинг "Ливерпули"дан ёмон кўринмаяпти. ПСЖга қарши Артета шогирдлари "қизиллар"дан ёмон ўйнамади. Чемпионлар Лигасининг бўлажак ғолибига қарши имтиҳондан муваффақиятли ўта олди. Бундан ташқари "Арсенал" "Реал"ни мусобақадан чиқариб юборди. Плей-оффда буни кучсиз жамоалар амалга ошира олмайди. Ҳимоядаги ўйин тартибга солингандек, фақатгина марказий ҳужумчи етишмаяпти. Артета эса ҳамон хато қилишдан қўрқмоқда. Жамоа Шешко билан шартнома тузса-ю, АПЛда лиганинг бошқа "меҳмони" Гёкереш голлар уришни бошласа-чи?

Виктор "Манчестер Юнайтед" ва "Арсенал"дан охирги қадамни кутмоқда. Шешко "канонирлар" томонидан қизиқиш анчадан буён борлигини яхши билади, лекин "Лейпциг" нархни туширмоқчи эмас. Немислар ҳужумчи трансферидан 80 миллион евро ишлаб олмоқчи. Бундай нархга АПЛга турли форвардлар келган. Лондонликлар ўзининг Дарвин Нуньесини "топишни истамаяпти". Англиядагилар "Ливерпуль" "Ньюкасл" билан Исаак бўйича оғир ўтган музокаралардан кейин бор эътиборини Гёкерешга қаратгани ҳақида айтишмоқда. Слотга ҳам янги "тўққизлик" керак.

"Арсенал"нинг охирги трансферларида ҳужум чизиғини кучайтирадиган футболчи кўринмаяпти, Стерлинг, Троссард ва Мартинелли эса Артетани АПЛ қиролига айлантира оладиганга ўхшамаяпти. Шешко эса Жезусдан камида жисмонан бақувватроқ. Бразилиялик кўп жароҳат олади ва ҳеч қачон иккинчи Агуэро бўла олмади. Айнан шунинг учун Гвардиол Жезусни қўйиб юборди ва "Манчестер Сити"га Холандни олиб келди. Хосепнинг Лондондаги шогирди шунга ўхшаш йўлдан кетади чоғи. Артета соврин ютиши керак, уларсиз америкалик босснинг "сабр косаси" тўлиши аниқ.

Тан олиш зарур, Микель сифатли жамоа қура олди. Бироқ агарда Парти кетиб, Субименди бошқа клубни танласа, таянч зонада ҳам муаммолар пайдо бўлиши мумкин. Шунингдек, "Барса"га орзу бўлиб қолган Нико Уильямс варианти ҳам энди реалликдан анча йироқ. АПЛда яққол фаворитлар бор. Кучлилар ҳақида гап кетганда Артета Гвардиола ва Слотдан юқори турмайди. "Арсенал" кучли жамоага айлана олди, бироқ кейинги даражага кўтарилиш учун Микель нолишни бас қилиб, чинакамига кучли трансферларни амалга ошириши зарур. Артетанинг иккиланиши жамоани чемпионликдан узоқлаштирмоқда, мана бир неча йилдирки Лондонда кучли марказий форвардни кутишмоқда.

Сиз нима деб ўйлайсиз, "Арсенал"га Гёкереш керакми, ёки Шешко?

TerminaTor таржимаси