АПЛ. Кечаги кун қаҳрамонлари ФОТО

Биз кечаги ўйинларда ўзини кўрсатган футболчиларни ёдингизга соламиз. 

"Ньюкасл" - "Сандерленд" 1:1
Қаҳрамон: Александр Митрович

Тайн ва Уир дербисида Англия премьер-лигасида қолиш учун кураш олиб бораётган икки клуб тўқнаш келди. Мезбонлар сафида сербиялик Александр Митрович сўнгги дақиқаларда гол уриб "Ньюкасл"ни мағлубиятда қутқариб қолди. Шу тариқа "ҳаккалар" Рафаэль Бенитес бошчилигида илк бор очко олишди. Митрович баҳс охирида тўқнашувда бошидан жароҳат олди. Шифокорлар унга майдонга тушиш мумкин эмаслигини айтишди, Митрович бунга қарши бўлди. Сабаби бу пайтга келиб алмаштиришлар қолмаганди ва жамоаси 10 киши бўлиб қолишини истамади. Бенитес ва шифокорлар уни бир амаллаб майдонга туширишмади. Ҳужумчининг ғалабага бўлган интилиши мухлисларнинг олқишига сабаб бўлди.

"Саутгемптон" - "Ливерпуль" 3:2
Қаҳрамон: Садио Мане

Рональд Куман бошчилигидаги "Саутгемптон" бу турда ажойиб иродали ғалабага эришди. Жамоа ўз уйида "Ливерпуль"га қарши баҳснинг 63-дақиқасига келиб 0:2 ҳисобида ютқазаётганди. Шундан кейин мезбонлар Юрген Клопп шогирдларини 3 бор ранжитишди. Бунда Садио Маненинг хиссаси катта бўлди. У иккита гол уришга эришди. Агар 50-дақиқада пенальтидан ҳам гол ура олганида хет-трикка эришган бўларди.

"Манчестер Сити" - "Манчестер Юнайтед" 0:1
Қаҳрамон: Маркус Рэшфорд

18 ёшли Маркус Рэшфорд Манчестер дербисида гол урган энг ёш футболчига айланди. Бу ҳақда сайтимизда хабар чиқди. Кечаги дербида мактаб ўқувчиси бўлган Рэшфорд "Сити"нинг тажрибали ҳимоячиси Мартин Демичелисни қийнаб қўйди. Маркус ўзидан деярли 20 ёш катта бўлган футболчини алдаб Англия терма жамоаси асосий посбони Жо Харт қўриқлаётган дарвозага гол уриб "қизил иблислар"га ғалаба келтирди.

"Тоттенхэм" - "Борнмут" 3:0
Қаҳрамон: Харри Кейн

Ўтган мавсум кашфиёти бўлган Харри Кейн бу мавсумни у қадар яхши бошлай олмаганди. Дастлабки 9та турда атига битта гол урган ҳужумчи айни пайтда 21та гол билан тўпурарлар пойгасида биринчи ўринда бормоқда. Ўтган турда "Астон Вилла" дарвозасига иккита гол урган Кейн кеча "Борнмут"га ҳам иккита тўп киритди. "Шпорлар" "Лестер"нинг ортидан қувишда давом этишмоқда.