АПЛ борасидаги миш-мишлар ҳақиқатга айланмоқда

Гап шундаки, бугун АПЛ клублари раҳбарлари иштирокида йиғилиш бўлиб ўтган ва унда FA раҳбари Грег Кларк лиганинг қолган қисми ўтказилмаслигини ва натижалар нолга тенглаштирилишини маълум қилган. Бироқ ҳозирда бу борадаги якуний қарор қабул қилинмаган.

Бир неча клубларнинг раҳбарлари ушбу таклифга ўзининг ижобий жавобини беришган.

"Биз футбол ҳақида ўйламаяпмиз. Мавсумнинг қолган қисмини ўтказиш эса режамизда ҳам йўқ", - деб сўзларидан иқтибос келтиради "Таймс". Нашр ушбу гаплар Кларк томонидан янграганини маълум қилган.

Шундай бўлган тақдирда, АПЛнинг қолган қисми ўтказилмайди ва ўтган 29 турдаги натижалар бекор қилинади. Чемпион аниқланмайди ва еврокубокларга чиқадиган жамоалар турнир жадвалининг ушбу кўриниши орқали чиқариб олинади.

Август ойида эса АПЛнинг сўнгги 6 ўриндаги жамоалари иштирокида плей-офф ўйинлари ўтказилади ва унда лигада қоладиган ва чемпионшипга тушиб кетадиган жамоалар номи маълум бўлади.

Агарда лиганинг қолган қисми бекор қилинадиган бўлса, ташкилот ва клублар йўқотадиган маблағ 1 млрд фунтдан ҳам ошиб кетади. Қайд этилишича, Англиядаги ҳозирги ҳолат унчалик яхши эмас ва Буюк Британия спорт вазири ҳам 3-4 ой давомида бирорта спорт ўйинлари бўлмаслиги борасида дастур ишлаб чиқмоқда. Катта эҳтимол билан бу борадаги қарор шу ой охирларида қабул қилинади ва спорт ҳамда футбол баҳор ойида Англияга қайтмайди.