Анвар Бердиев: "Хоразм" жамоаси уй ўйинларини тезроқ табиий майдонда ўтказишларига тилакдошман"

Ўйин ҳақида

- Бугун қийин учрашув ўтказдик. Албатта, биз бу ўйин қийин бўлишини билардик. "Хоразм" жамоасига тезроқ сунъий майдондан чиқиб уй ўйинларини табиий майдонда ўтказишларига тилакдошман.

Фарғона вилоятидан узоқ йўл босиб келиб бизни қўллаб-қувватлаган мухлисларга жамоамиз номидан раҳмат айтаман. Шунингдек, "Хоразм" жамоасини ўйин давомида фаоллик билан ишқибозлик қилган маҳаллий мухлисларга ҳам миннатдорчилик билдираман.

- Сизнингча, "Турон" бугун 1 очко қўлга киритдими ёки 2 очко йўқотдими?

- Ўйиннинг боришидан келиб чиқсак, биз 2 очко йўқотдик. Чунки сўнги дақиқаларда Бобур Қосимовнинг майдон эгалари дарвозасига киритган голи инобатга олинмади. Бу вазиятда яққол гол бўлганди, билмадим, ён ҳакамлар бу каби қарорларни қандай чиқаришади, хайронман. Қийин майдонда ўйин ўтказаяпмиз, ҳакам биргина тушунарсиз қарори билан йигитларнинг шунча меҳнатини йўққа чиқарди. Тўғрисини айтганда, йигитларнинг меҳнатига ачинаяпман.

- Анвар ака, сиз ўз вақтида моҳир ҳужумчи бўлгансиз. Шундан келиб чиқиб айтингчи, ўзбек футболида ҳужумчилар танқислигига сабаб нима?

- Ўзбек футболида ҳозир яхши ҳужумчилар бор. Кейинги йилларда уларнинг сони янада кўпаяди. Бизга ҳозирда ҳужумчилар билан ишлайдиган алоҳида мураббийлар зарур. Шунда албатта келажакда ҳужумчилар танқислиги муаммоси бартараф этилади, кўплаи истеъдодли ҳужумчилар етишиб чиқади деб ўйлайман.